BE kerkon të përgatisë qytetarët në rast lufte në Evropë

Strasbourg, France - September 13, 2019: Entrance of the Louise Weiss building, inaugurated in 1999, the official seat of the European Parliament which houses the hemicycle for plenary sessions.

Pas garës së armëve, BE tani dëshiron që çdo evropian të jetë i përgatitur për situata krize, nga fatkeqësitë natyrore deri te konfliktet e mundshme, sipas “Il Messaggero”.

Nuk ka nevojë të jemi alarmues, ajo që Komisioni do të zbulojë mëngjesin e sotëm është një strategji për “përgatitjen e shtetësisë”.

Sipas El País, dokumenti do të bëhet publik sot dhe do të ftojë popullsinë evropiane të përgatisë furnizime, veçanërisht ushqime, ujë dhe ilaçe, që do t’i lejojë ata të mbijetojnë për 72 orë pa ndihmë të jashtme në rast lufte ose krize klimatike.

“Koha është thelbësore në një kontekst krize”, thuhet në dokumentin që do të prezantohet nga Përfaqësuesja e Lartë, Kaja Kallas.

Por çfarë duhet të përmbajë seti? Për momentin nuk ka të dhëna të caktuara, por është e mundur që ajo të ndjekë rekomandimet e lëshuara tashmë nga shtetet e tjera evropiane, përfshirë Finlandën dhe vetë Belgjikën.

Brukseli në fakt i ka kërkuar popullatës së tij të ketë një sërë elementësh thelbësorë në shtëpi: furnizime me ujë të pijshëm dhe ushqime jetëgjatë, filtra uji, kuti të ndihmës së parë për problemet shëndetësore (ilaçe, dezinfektues, etj.).Ndër kërkesat janë edhe një radio me bateri, për të qenë të informuar edhe në rast ndërprerjeje të energjisë, bateri të jashtme (powerbank) dhe karikues për pajisjet elektronike për të qëndruar në kontakt me botën e jashtme.

Synohet që popullsia të jetë e vetëmjaftueshme për të paktën 72 orë në rast të mungesës së shërbimeve bazë.Dokumenti do të përfshijë gjithashtu 30 veprime kyçe për përgatitjen e qytetarëve për çdo lloj fatkeqësie, duke iu referuar kurseve të specializuara.

Ervin Muça zyrtarisht i pandehur për hakërimin e sistemit TIMS, reagon Salianji: Histori mafioze, një tjetër arsye pse u burgosa

Ervin Salianji ka reaguar në lidhje me vendimin e Prokurorisë së Tiranës për të marrë të pandehur Ervin Muçën, drejtorinë IT në Policinë e Shtetit, në lidhje me akuzat për ndërhyrje në sistemin TIMS.

Postimi i plotë:

TIMS histori mafioze, nga emërimet e paligjshme tek manipulimi i sistemit e deri tek mbajtja në sirtaret e Elizës ne boten e paligjshmerise tregojne urgjencen qe SPAK duhet ta hetojë më thellë skandalin.

Arrestimi i Ervin Muçës, ish-drejtor i IT në Policinë e Shtetit, është dëshmia se Komisioni Hetimor Parlamentar për ndërhyrjet në TIMS dokumentoi ekzaktësisht

pasigurinë dhe paaftësinë dhe keqppërdorimin e administratës shtetërore për të mbrojtur sistemet dhe informacionet e rëndësishme shtetërore. Ndërhyrja në sistemet kompjuterike dhe kopjimi i të dhënave në TIMS cënoi rëndë sigurisë kombëtare.Vetëm Edi Rama ka fuqinë të imponojë që kjo çështje të rrijë në sirtarët e Kuvendit dhe te mos i dergohet SPAK per hetime te mëtejshme sic eshte detyrimi ligjor por dhe kerkesa e komisionit! Burgosja ime është dhe për ketë arsye, per tu harruar ceshtja dhe per te mos u hetuar perfituesi kryesor; Edi Rama!

******

Disa prej gjetjeve të Komisionit Hetimor;
Pavarësisht pengesave Komisioni Hetimor bëri gjetje përtej parashikimeve dhe arritëm të faktonim abuzimet dhe nderhyrjet ne sistemin TIMS!
1. Gjetja e parë: Nga dokumentacioni i administruar dhe dëshmitë e marra nga Komisioni Hetimor ka rezultuar se zoti Ervin Muça nuk përmbushte kushtet për t’u emëruar në detyrën e Drejtorit të Departamentit të IT-së. Konkretisht, ky shtetas ishte proceduar penalisht për falsifikim dokumentesh në shtetin italian në vitin 2007, ishte refuzuar leja e qëndrimit në vitin 2008, nuk kishte plotësuar formularin e dekriminalizimit, nuk kishte kryer trajnimet e detyrueshme në Akademinë e Sigurisë, nuk ishte pajisur me Certifikatën e Sigurimit të Personelit dhe ishte njëkoësisht i punësuar si këshilltar i drejtoreshës së Agjencisë Shtetërore të Kadastrës, megjithëse hetimet e kryera nga Prokuroria nuk kanë gjetur ndonjë produkt konkret pune.

2. Gjetja e dytë: Nga dokumentacioni i administruar dhe dëshmitë e marra nga Komisioni Hetimor rezulton se procedurat e rekrutimit të ish-drejtorit Besjon Tanuzi dhe drejtorit aktual Enri Ndoni kanë qenë fiktive dhe me rezultat të paracaktuar. Kjo duket nga fakti që ata kanë aplikuar dokumentet për t’u emëruar në këto pozicione para krijimit të vakancës, nuk ka pasur asnjë shpallje për vendin vakant në këto pozicione dhe kanë qenë kandidaturat e vetme që i janë paraqitur për miratim Drejtorit të Përgjithshëm të Policisë së Shtetit. Nga ana tjetër, rezulton se zoti Tanuzi nuk kishte asnjë eksperiencë të mëparshme në Policinë e Shtetit apo sistemet e informatike të kësaj të fundit dhe nuk ishte pajisur me çertifikatë sigurie, ndërsa duket se marrëdhënia miqësore me shtetasin Ervin Muça ka qenë vendimtare për emërimin e tij.

3. Gjetja e tretë: Nga dokumentacioni i administruar dhe dëshmitë e marra nga Komisioni Hetimor rezulton se procedura e ndjekur për emërimin e Drejtores së Hetimit të Krimit Kibernetik Ervina Gjana ka qenë fiktive dhe me rezultat të paracaktuar. Kjo del qartazi nga fakti se zonja Gjana ka depozituar dokumentacionin përpara shpalljes së vendit vakant, ka qenë kandidaturë e vetme, aplikimet janë hapur vetëm për dy ditë dhe emërimi është kryer përpara trajnimit në Akademinë e Sigurisë, në shkelje të përcaktimeve ligjore të Ligjit nr. 1082014 “Për Policinë e Shtetit”. Po ashtu, rezulton se zonja Gjana nuk kishte asnjë eksperiencë të mëparshme në hetimin e krimeve kibernetike, certifikata e saj e sigurisë nuk ishte konform detyrës së re dhe në vitin 2014 që përkon me largimin nga detyra e specialistes së Sektorit të Serverave në Drejtorin e Teknologjisë së Informacionit, ishin referuar materialet proceduriale si e dyshuar për kryerjen e veprës penale të “Vjedhjes”, e parashikuar nga neni 134 i Kodit Penal.

4. Gjetja e katërt: Nga dokumentacioni i administruar dhe dëshmitë e marra nga Komisioni Hetimor ka rezultuar se njoftimi i parë për një ndërhyrje të paligjshme në sistemin TIMS ka ardhur nëpërmjet një email-i në orën 1451 të datës 02.08.2023 nga shefi i Sektorit të Serverave, zoti Ardit Muço, i cili iu është përcjellë drejtuesve kryesorë të Policisë së Shtetit. Më pas njoftimi i dytë ka ardhur nëpërmjet një email-i në orën 2254 të datës 02.08.2023, ku krahas drejtuesve të Policisë së Shtetit, janë informuar mediat dhe drejtuesit kryesorë të shtetit, përfshirë Ministrin e Brendshëm dhe drejtorin e Agjencisë së Mbikëqyrjes Policore. Megjithë njoftimet e marra nga Ministri i Brendshëm, zoti Taulant Balla, Drejtori i Përgjithshëm i Policisë së Shtetit, zoti Muhamet Rrumbullaku, Drejtori i Agjencisë së Mbikëqyrjes Policore në datën 02.08.2023, datë në të cilën ka filluar edhe ndërhyrja në sistemin TIMS, reagimi institucional ka ardhur vetëm ditën e nesërme në datën 03.08.2023. Deklarimet e zotit Balla, zotit Rrumbullaku dhe zoti Veliu sa i përket marrjes dijeni dhe komunikimeve me njëri-tjetrin janë kontradiktore dhe nuk përputhen me njëra-tjetrën. Nëse reagimi do të kishte qenë në kohë, ndërhyrja e filluar në orën 1800 të datës 02.08.2023 dhe e shtrirë deri në orën 0200 të datës 03.08.2023, mund të ishte parandaluar.

5. Gjetja e pestë: Nga dokumentacioni i administruar dhe dëshmitë e marra nga Komisioni Hetimor ka rezultuar se shtetasi Ervin Muça, me detyrë Drejtor i Departamentit të IT-së në Policinë e Shtetit, së bashku me Drejtorin e Drejtorisë së Sistemeve, Besjon Tanuzaj, dhe punonjës të tjerë të Departamentit të IT-së, kanë kryer një sërë shkeljesh ligjore, duke vënë në rrezik sigurinë e sistemit të dhënave TIMS. Konkretisht, këta shtetas në bashkëpunim me njëri-tjetrin kanë lejuar hyrjen e paautorizuar në ambientet e rëndësisë së veçantë të Policisë së Shtetit, nuk kanë marrë leje apo autorizim paraprak nga Drejtori i Përgjithshëm i Policisë së Shtetit për kryerjen e procesit të back-up-it, kanë bërë transferimin pjesërisht të të dhënave të sistemit TIMS në pajisje të jashtme, kanë hyrë në godinë duke përdorur kodin e një punonjëse që ishte me leje vjetore, kanë operuar në orët e vona të natës dhe jashtë orarit zyrtar, kanë urdhëruar vartësit për kryerjen e detyrave në kundërshtim me ligjin, si dhe nuk kanë hartuar aktet sipas Urdhërit Nr. 3410, datë 28.04.2023 të Drejtorit të Përgjithshëm të Policisë së Shtetit. Megjithë shkeljet flagrante të ligjit, këta punonjës janë pezulluar vetëm për një periudhë 5-ditore dhe më pas janë lejuar që të vijojnë punën normalisht, pa filluar procedura e shkarkimit nga detyra, në kushtet kur qoftë Drejtoria e Përgjithshme e Policisë së Shtetit, ashtu edhe Agjencia e Mbikëqyrjes Policore kishin konstatuar kryerjen e veprimeve a mosveprimeve në kundërshtim me ligjin, dhe duke vënë në rrezik sigurinë e një infrastrukture kritike për Policinë e Shtetit.

6. Gjetja e gjashtë: Nga dokumentacioni i administruar dhe dëshmitë e marra nga Komisioni Hetimor rezultoi se në datën 14 tetor 2021, ka pasur një sulm kibernetik në sistemet informatike të Policisë së Shtetit, përfshirë edhe sistemin TIMS. Ky sulm nuk është raportuar, nuk janë kryer verifikime apo hetime të thelluara, si dhe nuk janë marrë masa për pastrimin e sistemeve nga viruse të mundshme apo forcimin e masave të sigurisë për rreziqe që mund t’i kanoseshin sistemit nga sulme kibernetike. Po ashtu, rezultoi se në datën 9 shtator 2022 ka pasur një sulm të dytë të sistemeve informatike të Policisë së Shtetit, përfshirë sistemin TIMS, i cili sipas dëshmive ishte pasojë e drejtpërdrejtë e mosmarrjes së masave në rastin e sulmit kibernetik të tetorit 2021. Si rezultat i këtyre dy sulmeve, drejtuesit e Departamentit të IT-së në Policinë e Shtetit kanë deklaruar se të dhënat e sistemit TIMS deri në shtatorin e vitit 2022 gjendet në kanale online, dhe mund të blihen nga çdo person që mund të jetë i interesuar. Lidhur me këto pretendime, të cilat mbështeten edhe në dokumentacion zyrtar nuk rezulton që të ketë pasur hetime të thelluara administrative apo penale nga institucionet ligjzbatuese. Moskryerja e këtyre hetimeve dhe marrja e masave të nevojshme rrit rrezikun për përsëritjen e sulmeve kibernetike me pasoja shkatërruese për sistemet kritike të Policisë së Shtetit në të ardhmen.

7. Gjetja e shtatë: Nga dokumentacioni i administruar dhe dëshmitë e marra nga Komisioni Hetimor ka rezultuar se persona të caktuar kanë pasur akses të paautorizuar në sistemin TIMS. Megjithëse, ligji dhe aktet nënligjore parashikojnë në mënyrë të detajuar se si një personi i jepet akses në sistemin TIMS, mbetet e paqartë se si persona privatë, pra që nuk ushtrojnë një detyrë shtetërore që lidhet me aksesimin dhe përdorimin e sistemit TIMS, iu është akses në këtë bazë të dhënash me rëndësi të veçantë. Jo vetëm mënyra, por edhe personat që iu kanë dhënë këtë akses, qëllimet dhe motivet e këtyre personave privatë që kanë pasur akses në sistemin TIMS mbeten të paqarta dhe ngrejnë dyshime serioze për paligjshmëri. Sistemi TIMS përmban një shumëllojshmëri të dhënash, ashtu siç e kemi shpjeguar më lart, dhe aksesi i lirë nga persona të paautorizuar përbën një rrezik serioz për rendin dhe sigurinë në vendin tonë. Kjo situatë, për të cilën qoftë Ministri, ashtu edhe drejtuesit më të lartë të Policisë së Shtetit duken se ishin në dijeni, duhet të kishte nxitur këta të fundit për marrjen e masave urgjente për kryerjen e një hetimi të thelluar të hyrjeve të paautorizuar në sistemin TIMS dhe marrjen e masave që situata të tilla të mos përsëriten në të ardhmen.

8. Gjetja e tetë: Nga të dhënat publike dhe faktet e njohura botërisht, të cilat u sollën nga anëtarët e Komisionit Hetimor, rezulton se punonjës të Policisë së Shtetit, të cilët kanë për detyrë të ruajnë dhe administrojnë të dhënat e sistemit TIMS, e kanë përdorur të drejtën e aksesit për t’ua vënë në dispozicion të dhënat e këtij sistemi elementëve të krimit të organizuar, të cilët kanë interes të veçantë për t’u njohur me hyrje-daljet e shtetasve nga territori i Shqipërisë, urdhërat e arrestit, ndalimit, kërkimit, masat ndaluese nga shtetet e huaja, vendimet gjyqësore penale nga autoritetet shqiptare apo të huaja, automjetet me të cilat lëvizin shtetas të caktuar etj. Për marrjen e këtij informacioni, këta shtetas janë të gatshëm të ofrojnë shuma të konsiderueshme monetare, në mënyrë që të mësojnë në kohë reale informacione që përmban sistemi TIMS pë rata vetë apo kundërshtarët e tyre. Të dhënat e sistemit TIMS iu kanë shërbyer grupeve kriminale për të bërë eleminimin e kundërshtarëve të tyre, për të kufizuar lëvizjet jashtë vendit apo edhe për t’u arratisur në rastet kur ndaj tyre janë lëshuar urdhër arreste kombëtare apo ndërkombëtare.

9. Gjetja e nëntë: Nga dokumentacioni i administruar dhe dëshmitë e marra nga Komisioni Hetimor ka rezultuar se në sistemin TIMS janë kryer ndërhyrje, të cilat mundësojnë që për persona të caktuar, të mos regjistrohen hyrje-daljet e tyre nga territori i Republikës së Shqipërisë, si dhe nëse regjistrohen, kërkimi në bazën e të dhënave të TIMS nuk bëhet i plotë duke shmangur databazat e të dhënave kriminale, çka mundëson që shtetas shqiptar apo të huaj që mund të jenë në kërkim kombëtar a ndërkombëtar, apo të dënuar për kryerjen e krimeve, të hyjnë dhe dalin lirisht nga territori pa pasur ndonjë alert nga sistemi. Ky devijim, siç është shprehur edhe Drejtori i Departamentit të IT-së, Ervin Muça, iu shërben kryesisht individëve me rekorde kriminale dhe mund të shpjegojë edhe faktin se si persona në kërkim nga organet shqiptare të drejtësisë ia kanë dalë të dalin apo hyjnë në territorin e vendit tonë pa u zbuluar nga institucionet ligjzbatuese. Edhe kjo problematikë meriton vëmendje të veçantë dhe adresim të menjëhershëm pasi përbën një rrezik serioz për rendin dhe sigurinë, si dhe dëmton rëndë punën e organeve të drejtësisë, qofshin ato shqiptare apo të huaja.

10. Përgjegjësitë institucionale: Në vijim të gjetjeve të mësipërme, kanë përgjegjësi për kryerjen e veprimeve a mosveprimeve në kundërshtim me ligjin, në bashkëpunim me njëri-tjetrin, duke dëmtuar rëndë interesat e shtetit dhe duke sjellë përfitime të paligjshme për shtetas të caktuar!

11. Për hetimin e rolit dhe veprimtarisë së paligjshme të këtyre shtetasve, vlerësojmë se është e nevojshme të kryhet një hetim i plotë, i thelluar dhe i gjithëanshëm nga Prokuroria e Posaçme kundër Korrupsionit dhe Krimit të Organizuar (SPAK). Kjo e fundit mund të nxjerrë në dritë edhe fakte të reja të paligjshme, ashtu si edhe të identifikojë persona të tjerë, që mund të jenë identifikuar gjatë hetimit parlamentar. Sjellim në vëmendje, se për shkak të zvarritjes së dërgimit të kërkesave për informacion nga deputetët e mazhorancës, vonesës në kthimin e përgjigjeve nga institucioneve apo moskthimin e përgjigjeve nga institucionet, si në rastin e Këshillit të Ministrave, rrëzimit të kërkesave për thirrjen e dëshmitarëve të tjerë dhe kohës së shkurtër në dispozicion, Komisioni Hetimor i Kuvendit ka qenë në pamundësi objektive për të kryer të gjitha veprimet e nevojshme hetimore që do të çonin në zbardhjen e plotë të së vërtetës. Prandaj, SPAK, pasi t’i vihet në dispozicion ky material, në përputhje edhe me kompetencën e saj lëndore të parashikuar nga neni 135, pika 2, e Kushtetutës së Shqipërisë, dhe neni 75a të Kodit të Procedurës Penale, ka mundësi të hetojë dhe zbardhë të plotë veprimtarinë e paligjshme të personave të sipërcitua

Fate Velaj u emërua ambasador pa plotësuar kriteret/ Skandali trondit politikën austriake

Një skandal po trondit politikën në Austri dhe në qendër të tij është emërimi i ambasadorit shqiptar, Fate Velaj. Pasi shërbeu si deputet i Edi Ramës, Velaj u emërua nga kryeministri për të shërbyer si kryediplomat në Vjenë.

Ky emërim është kritikuar edhe më përpara në Shqipëri, por përmasat e këtij skandali po tronditin qeverinë dhe politikën austriake. Media investigative “FoB” në Austri ka publikuar një hetim të thelluar për këtë çështje.

Emërimi i Fatmir Velajt si ambasador i Shqipërisë në Vjenë në vitin 2023 po kthehet gjithnjë e më shumë në një fuçi baruti diplomatike dhe politike. Rasti nga Shqipëria aktualisht po hedh shumë pluhur mbi Ministrinë e Jashtme të Beate Meinl-Reisinger (nga partia NEOS). Çështja Velaj tani po kthehet në një çështje politike, duke e vendosur qeverinë e re federale në një situatë të pasigurt.” – shkruan media austriake.

Që kur u mësua emërimi i Velajt në Austri, për të zëvendësuar në këtë post ambasadorin Roland Bimo, partia NEOS kishte ngritur pikëpyetje duke theksuar se ai nuk plotëson kriteret.

Në vitin 2024, emërimi i Velajt si ambasador u diskutua për herë të parë në një seancë nga anëtari i atëhershëm i Këshillit Kombëtar të NEOS, Helmut Brandstätter. Kërkesa tregon se sa të thella janë dyshimet për papërshtatshmërinë e tij. Ajo përmban 14 pyetje të detajuara në lidhje me papajtueshmëritë e mundshme, kërkesat që mungojnë dhe ndikimin politik.

Ndër të tjera, Brandstätter donte të dinte nëse Velaj kishte nënshtetësi të dyfishtë austriako-shqiptar në kohën e emërimit të tij, dhe nëse ai kishte aktivitet tregtar aktualisht në Austri. Sipas praktikës, të dyja do të ishin arsye për përjashtim nga akreditimi si ambasador i një vendi të tretë.

Pyetja fjalë për fjalë thotë: “A është e vërtetë që kandidati i caktuar ushtron një aktivitet tregtar në Austri? A do të ishte kjo një arsye për përjashtim?”

Gjithashtu pyetet: “A dihet nëse kandidati i caktuar ka hequr dorë nga shtetësia austriake apo do të hiqte dorë nga ajo nëse emërohej?”,” shkruan media austriake.

Por pavarësisht kësaj, Velaj e mori akreditimin dhe nisi punën.

“Ajo që është veçanërisht shpërthyese është dyshimi se një anëtar i qeverisë mund të ketë ndërhyrë në emër të Velajt, pavarësisht shqetësimeve ekzistuese,” vijon më tej investigimi.

“Biografia e Velajt duket meteorike në pamje të parë. Ish-azilkërkuesi nga Traiskirchen mori jo vetëm Medaljen e Artë të Meritës së Republikës së Austrisë, por edhe titullin “Profesor”. Sipas certifikatës së çmimit të datës 13 dhjetor 2019, ai u nderua për arritjet e tij si “piktor, fotograf, shkrimtar, gazetar, menaxher kulturor dhe kurator ekspozite”. Certifikata është në dispozicion të ekipit redaktues,” thuhet në shkrim.

Por kush ka ndërhyrë që Velaj të vazhdonte punën?

Tashmë është e qartë edhe pse me vonesë: Ministrja e Jashtme Meinl-Reisinger është nën presion për të vepruar. Sipas dosjeve të brendshme të Ministrisë së Jashtme, Velaj mësohet se ka ndërhyrë personalisht në disa raste. Në interes të transparencës dhe higjienës politike, i gjithë procesi duhet të rishqyrtohet. Pyetja qendrore është nëse ka pasur ndikim të padrejtë gjatë emërimit si ambasador”.

“Një hap i tillë do të kishte peshë edhe në nivel ndërkombëtar. Kjo mund të çojë në tensione diplomatike me Tiranën dhe të hedhë një dritë shqetësuese mbi standardet e politikës së jashtme austriake”.

“Shqipëria është aktualisht nën presion gjithsesi: vetëm muajin e kaluar, prokuroria e posaçme shqiptare arrestoi kryebashkiakun e Tiranës Erion Veliaj për ryshfet të dyshuar, pastrim parash dhe fshehje të ardhurash.

Një gjë është e sigurt: Shumë pyetje mbeten pa përgjigje në rastin Velaj. Por një gjë është tashmë e qartë – nëse rezulton se një kandidat i papërshtatshëm është emëruar ambasador përmes ndërhyrjes politike, ekziston rreziku i një skandali diplomatik me pasoja të konsiderueshme.

Dhe një gjë është po aq e sigurt: kjo çështje nuk mund të anashkalohet thjesht me buzëqeshje në aspektin e politikës së jashtme”, e mbyll shkrimin media austriake.

Dy makina janë përplasur kokë më kokë ,plagosen tre persona

Një aksident i rëndë ndodhi në aksin rrugor Lezhë-Shëngjin. Dy makina janë përplasur kokë më kokë dhe për pasojë kanë mbetur të lënduar tre persona, ku dy prej tyre janë në gjendje të rëndë.

Njëri prej të plagosurve në gjendje të rëndë është nisur drejt Tiranës për mjekim më të specializuar. Nuk dihen ende arsyet e aksidentit të rëndë.

Partitë politike nënshkruajnë Kodin e Etikës për Fushatat Digjitale në Shqipëri

Në Komisionin Qendror të Zgjedhjeve u nënshkrua sot nga përfaqësuesit e partive politike pjesëmarrëse në zgjedhjet për Kuvend, Kodi i Etikës për Fushatat Digjitale në Shqipëri.Kodi i etikës për fushatat digjitale në Shqipëri do të shërbejë si një marrëveshje e përbashkët për të nxitur standardet etike, për të luftuar dezinformimin dhe keqinformimin në zgjedhje, si dhe për të siguruar një fushë loje të barabartë në sferën digjitale.

Ky kod etike është hartuar në bashkëpunim me Institutin Demokratik Amerikan (NDI), Institutin Ndërkombëtar për Demokraci dhe Asistencë Zgjedhore (International IDEA) dhe Qendrën e Sundimit të Ligjit në Universitetin e Helsinkit, sipas modelit të zgjedhjeve evropiane të vitit 2024, si dhe nismave të tjera të ngjashme në Holandë, apo në Maqedoninë e Veriut.

Komisioneri Shtetëror i Zgjedhjeve, Ilirjan Celibashi falënderoi subjektet zgjedhore të cilat e mirëpritën këtë iniciativë dhe shtoi se ky Kod synon të nxisë partitë pjesëmarrëse në zgjedhjet e datës 11 maj 2025 për të zhvilluar një garë të përshtatshme, të ndershme dhe të drejtë.

Shpresojmë që partitë dhe kandidatët garues të tregojnë vetëpërmbajtje gjatë fushatës zgjedhore dhe të zhvillojnë një garë me standarde etike.

Drejtuesja e Qendrës për Sundimin e Ligjit, Universiteti i Helsinkit, Tuija Brax tha se pavarësisht se ky Kod Etike është një instrument vullnetar, partitë politike kanë shansin t’u tregojnë votuesve të tyre se janë të angazhuara seriozisht dhe mund t’i besojnë ato.

Blerta Hoxha, përfaqësuese e International IDEA në Shqipëri vlerësoi angazhimin e të gjithë palëve në arritjen e këtij angazhimi dhe i përgëzoi partitë, pasi sipas saj marrja përsipër e këtij angazhimi proaktiv për zhvillimin e një fushate digjitale më etike, i bashkon me partitë politike simotra në Parlamentin Evropian.

Drejtuesja e Institutit Demokratik Amerikan, Ana Kovacevic Kadovic u shpreh se nënshkrimi i Kodit Etikës është reflektimi i asaj çfarë mund të ndodhë kur institucionet, partitë politike dhe partnerët bëhen bashkë për një qëllim të përbashkët, që në këtë rast është ta bëjmë me etike fushatën zgjedhore në një mjedis kaotik siç është bota digjitale.

Nënshkrimi i këtij kodi nga partitë politike simbolizon angazhimin e tyre për të zhvilluar një fushate digjitale etike dhe me integritet, duke kontribuar në një proces zgjedhor të drejtë dhe transparent.

Fredi Beleri padit kandidatin e PS në qarkun Vlorë ish-drejtorin e Arkivës/ Ardit Bido

Eurodeputeti Fredi Beleri ka kallëzuar të martën për shpifje në Gjykatën e Tiranës, ish-drejtorin e Arkivave, Ardit Bido. Avokati i Belerit ka deklaruar për mediat se ish-kryetari i bashkisë Himarë ishte personalisht në gjykatë për shkak se ndodhej në Tiranë.

Ndaj këtij lajmi ka reaguar dhe ish-drejtori i Arkivës Ardit Bido i cili thotë se Beleri kishte prej 1 viti e gjysëm që kishte humbur e nuk shfaqej në Tiranë, duke mos marrë pjesë në seancën gjyqësore për një kallëzim që Bido i ka bërë për shpifje.

Në një video mesazh Bido thotë se “duke dëgjuar se ai kandidon për PS në qarkun Vlorë ka shkuar në Tiranë të bëjë shoë e radhës”.

“Ne do shihemi në gjyq dhe është e sigurt që ai do humbasë gjyqin dhe do dënohet për shpifje. Sepse e vërteta nuk lidhet me fushatat elektorale. E vërteta është e tillë sepse është. Unë jam Ardit Bido dhe kam qëndrimet e mia, do të kem qëndrimet e mia pasi lidhen me të vërtetën”, thotë Ardit Bido.

Be miraton fondin për “Planin e Rritjes”, Shqipëria merr 64.5 milionë euro parafinancim

Shqipëria sapo ka marrë 64.5 milionë euro parafinancim sipas Planit të Rritjes së BE-së për Ballkanin Perëndimor! Kjo pagesë e parë mbështet reformat dhe investimet e Shqipërisë për të forcuar vendin dhe për ta afruar atë me BE-në”.

Lajmi është dhënë nga Ambasada e BE në vendin tonë me anë të një postimi në rrjetin social “X”.

Ambasadori i BE Silvio Gonzato ka uruar Shqipërinë për atë që e quajti një moment të rëndësishëm në rrugëtimin e saj të anëtarësimit në BE.

“Urime Shqipërisë për arritjen e një tjetër momenti të rëndësishëm në rrugëtimin e saj të anëtarësimit në BE. Plani i Rritjes nxit ekonominë, forcon sundimin e ligjit, mbështet një Shqipëri më të gjelbër dhe fuqizon kapitalin njerëzor. BE qëndron me Shqipërinë në rrugën e saj drejt anëtarësimit”, shkruan Gonzato.

Me këtë parafinancim, Shqipëria mori 30 milionë euro kredi koncesionare për buxhetin e shtetit, si mbështetje për zbatimin e reformave. Parafinancimi i mbetur prej 34.5 milionë euro, në grante dhe hua koncesionare, do t’i injektohet drejtpërdrejt WBIF-it (Western Balkans Investment Frameëork) për investime në infrastrukturë në Shqipëri.

“Ne e vlerësojmë këtë si një shenjë të qartë besimi nga BE në rrugën e reformave të Shqipërisë dhe progresin e qëndrueshëm drejt anëtarësimit në familjen evropiane. Ne përqafojmë plotësisht madhësinë e kësaj mundësie historike, si dhe angazhimet përpara, dhe jemi energjikisht të motivuar dhe të përgatitur për të vazhduar reformimin dhe përmbushjen e me zell të kritereve për anëtarësimin e Shqipërisë në Bashkimin Europian”, tha kryenegociatorja Majlinda Dhuka.

Deri në vitin 2027, Shqipëria ka mundësinë të marrë deri në 922.1 milionë euro në total nga Fondi i Reformës dhe Rritjes për Ballkanin Perëndimor, në këmbim të reformave në sundimin e ligjit dhe të drejtat themelore, energjinë e rinovueshme, ekonominë dixhitale, kapitalin njerëzor dhe zhvillimin e sektorit privat.

Pagesat e ardhshme në kuadër të Facilitetit do të bëhen me përfundimin e hapave të reformës të rënë dakord ndërmjet Komisionit dhe Qeverisë ahqiptare në Axhendën e Reformave. Ndërsa Shqipëria përparon në zbatimin e Axhendës së Reformave, BE do të zhbllokojë pagesat.

Plani i Rritjes së Ballkanit Perëndimor ofron një udhërrëfyes për të sjellë ekonomitë e Ballkanit Perëndimor më afër Bashkimit Evropian. Ai gjithashtu lehtëson aksesin gradual në tregun e vetëm, duke i lejuar qytetarët në Ballkanin Perëndimor të kenë disa përfitime të hershme nga integrimi në BE, si dhe mbështet integrimin e mëtejshëm ekonomik rajonal.

Plani i Rritjes ofron 6 miliardë euro ndihmë financiare shtesë për të mbështetur reformat socio-ekonomike dhe themelore dhe investimet përkatëse. Pagesat kushtëzohen me arritjen e reformave të specifikuara në Axhendat e Reformave të përgatitura nga secili përfitues.
Komisioni Evropian aktualisht po punon për vlerësimin e grupit të parë të hapave të reformës. Përmbushja e këtyre hapave do t’i japë Shqipërisë të drejtën për të marrë disbursimin korrespondues në kuadër të Facilitetit.

BIRN publikon rezultatet e anketës: SPAK ‘simbol shprese’ kundër korrupsionit të gjithëpërhapur në Shqipëri

Një hulumtim i kryer nga kompania ‘IDRA Research and Consulting’ zbulon se 91% e qytetarëve mendojnë se korrupsioni është ende problem madhor në Shqipëri. Hulumtimi gjithashtu evidenton praninë, ndikimin dhe pasojat e thella të korrupsionit dhe krimit të organizuar në çdo nivel të institucioneve dhe shoqërisë shqiptare, ndërsa thekson se qytetarët mbeten pesimistë që situata do të përmirësohet, megjithëse puna e Prokurorisë së Posaçme kundër Korrupsionit dhe Krimit të Organizuar, SPAK, shihet si një “simbol shprese”.

Sipas ekspertëve, përhapja e këtyre fenomeneve është ndikuar si nga kultura shoqërore, ashtu edhe nga ndërhyrja e politikës në institucionet publike.

“Korrupsioni në Shqipëri është në nivele të larta dhe i shtrirë në mënyrë kapilare në pothuaj çdo sektor dhe çdo institucion,” shprehet sociologu Ergys Mërtiri.

“Ky realitet ka të bëjë shumë me kulturën e shoqërisë në raport me ligjin, institucionet, punën, si edhe në konceptimin e marrëdhënies së individit me sferën publike, por sigurisht që ai ushqehet dhe ndikohet shumë nga politika,” shtoi ai.

Hulumtimi i titulluar: “Barrierat dhe mundësitë për të reduktuar korrupsionin dhe krimin e organizuar në Shqipëri” u realizua në gusht të vitit 2024.

Ai ka kombinuar elemente sasiore dhe cilësore për të përfshirë një gamë të gjerë perceptimesh dhe është porositur nga Shërbimi i Komunikimit i Qeverisë Britanike për të kuptuar perceptimet dhe përvojat e korrupsionit dhe krimit të organizuar te qytetarët dhe punonjësit e sektorit publik në Shqipëri, si dhe raportimin e këtyre çështjeve nga mediat.

Korrupsioni i gjithëpërhapur

Qytetarët besojnë se korrupsioni është ende një problem i madh në Shqipëri.

Sipas 98% të të intervistuarve, korrupsioni paraqet një pengesë në të paktën një aspekt të jetës publike. Shumica e të intervistuarve, 69% e tyre, mendojnë se faktori kryesor që kontribuon në korrupsion është keqpërdorimi i pushtetit politik për përfitime personale.

Ndërkohë, 52% vlerësojnë se ai vjen si pasojë e zbatimit të dobët të ligjeve kundër korrupsionit dhe 46% si pasojë e lidhjeve të ngushta mes bizneseve dhe partive politike. Hulumtimi zbulon se qytetarët mendojnë se pritshmëria për të dhënë ryshfet në këmbim të shërbimeve më të mira ka krijuar një kulturë korrupsioni në Shqipëri.

Ryshfeti dhe pagesat në këmbim të favoreve u theksuan si format më të zakonshme të korrupsionit në Shqipëri. Po ashtu, 83% e qytetarëve e identifikuan nepotizmin si një formë korrupsioni, ndërsa më shumë se gjysma identifikojnë forma të ryshfetit në disa fusha dhe skenarë të tjerë, duke përfshirë politikën, biznesin dhe shërbimet publike.

Shumë prej të intervistuarve kanë pranuar se ndonjëherë preferonin të paguanin ryshfet për të përshpejtuar punët e tyre.

Pjesëmarrësit më të moshuar në anketim kanë pranuar përgjegjësinë e tyre në mënyrën e adresimit të korrupsionit dhe kanë theksuar nevojën për edukimin e brezave të rinj. Po ashtu, të rinjtë kanë nënvizuar rëndësinë e edukimit dhe ndikimit të familjes, pasi shumë prej tyre raportuan se ofrimi i ryshfetit për shërbime ishte një sjellje e mësuar nga familjet e tyre dhe e vazhduar gjatë gjithë jetës.

Gjatë diskutimeve, kur prindërve dhe të rinjve u është mësuar se korrupsioni është i gabuar dhe duhet shmangur, të dy grupet janë shprehur se përvojat e jetës dhe rrethanat e vështira mund t’i gërryejnë ato vlera, duke i shtyrë të bëjnë kompromis me parimet etike që u janë ngulitur.

Veç përfitimeve individuale, njerëzit shprehen se nuk kanë mundësi të sfidojnë korrupsionin dhe nuk veprojnë, duke fajësuar qeverinë.

Sociologu Ergys Mërtiri shprehet se shqiptarët bashkëjetojnë kudo me forma të thjeshta dhe të përditshme të korrupsionit, që nga ndërhyrjet për një vend pune, për një notë në shkollë, për një licencë të pamerituar, e deri te shmangia e taksave, pagesave apo detyrimeve të ndryshme ndaj shtetit.

Ai nënvizon se ryshfeti, si një nga format më primitive të korrupsionit, në mjaft raste konsiderohet si i vetmi mekanizëm nëpërmjet të cilit mund të zgjidhësh nevojat e tua kudo.

“Sidomos në shëndetësi, ryshfeti jepet edhe pa ta kërkuar kush, pasi është bërë normë,” theksoi Mërtiri.

Sociologu shtoi se shoqëria shqiptare vuan nga mungesa e vlerësimit të publikes në tërësi, çka vjen nga kultura totalitare e formësuar në 50 vjet komunizëm.

“Shprehje të tilla si ‘mos luaj me zjarrin dhe shtetin’, që na vijnë nga ajo periudhë, burojnë nga një perceptim i frikës nga shteti dhe distancës së individit prej tij,” argumenton Mërtiri.

Edhe Pëllumb Nako, ish-funksionar i Policisë së Shtetit, vlerëson se korrupsioni në shoqërinë shqiptare i ka fillesat në kohë të largët, kur, sipas tij, nuk ekzistonte i ndarë koncepti publik nga ai privat.

Sipas Nakos, në këtë kontekst, korrupsioni “popullor” lind natyrshëm dhe bëhet më i dukshëm në marrëdhëniet e individit me administratën. Nako sjell si shembull korrupsionin në shëndetësi, ku krahas ryshfetit për shërbimin, ekziston edhe mirënjohja.

Sipas anketës, korrupsioni nxitet edhe nga keqpërdorimi i pushtetit për përfitime personale dhe zbatimi i dobët i ligjeve.

Keqpërdorimi i pushtetit politik për përfitime personale shihet si kontribuesi kryesor nga 69% e qytetarëve të pyetur, i ndjekur nga zbatimi i dobët i ligjeve kundër korrupsionit, lidhjet e ngushta midis bizneseve dhe partive politike, mungesa e transparencës në institucionet publike, mbrojtja e pamjaftueshme për ata që raportojnë korrupsionin, pagat e ulëta të zyrtarëve publikë, etj.

Lidhja e politikës me krimin

Krimi i organizuar perceptohet si i rrënjosur në shoqërinë shqiptare. Në raport evidentohet se një në njëzet qytetarë kanë qenë viktimë e krimit të organizuar, ose njohin dikë që ka qenë. Prodhimi, shpërndarja dhe trafikimi i drogës, si dhe pastrimi i parave, konsiderohen si format më të zakonshme të krimit të organizuar në vend. Lehtësimi i emigracionit të paligjshëm, mashtrimi dhe falsifikimi i dokumenteve gjithashtu shihen si të zakonshme.

Në disa rajone, si Fieri, Elbasani dhe Shkodra, të intervistuarit kanë raportuar se janë të vetëdijshëm për praninë e bandave lokale dhe kanë pohuar se kishin dijeni për familje apo fise të përfshira në aktivitete kriminale.

Tema e krimit të organizuar është vlerësuar më e ndjeshme, pasi disa prej të intervistuarve janë rezervuar për të folur rreth kësaj çështjeje në detaje. Sipas raportit, kjo mund të lidhet me perceptimin se krimi i organizuar është përhapur dhe lehtësuar nga individë me “status të lartë” dhe nga institucionet.

Disa prej të intervistuarve besojnë se grupet kriminale kontrollojnë institucione kyçe për të mbështetur aktivitetet e tyre të paligjshme. Sipas tyre, krimi i organizuar nxitet nga vështirësitë ekonomike.

Të intervistuarit kanë vënë në dukje lidhjen e krimit të organizuar me korrupsionin, duke theksuar se ato janë të ndërlidhura dhe e fuqizojnë njëra-tjetrën. Po ashtu, qytetarët besojnë se krimi i organizuar ka depërtuar në institucione, duke ndikuar strukturat politike dhe zgjedhjet.

“Kjo aleancë mes figurave kriminale dhe politikanëve jo vetëm që gërryen besimin tek proceset demokratike, por edhe forcon perceptimin se institucionet publike janë të pafuqishme për të kontrolluar krimin e organizuar”, citohet në raport.

Grupet e diskutimit gjatë këtij hulumtimi kanë theksuar se krimi i organizuar ndikon pothuajse çdo aspekt të jetës në Shqipëri – nga siguria publike dhe korrupsioni politik deri te zhvillimi ekonomik dhe mbrojtja e mjedisit. Pjesëmarrësit shprehën zhgënjim të thellë për paaftësinë e institucioneve për të luftuar krimin e organizuar, duke i lënë komunitetet të pambrojtura ndaj pasojave të tij të mëdha.

“Në Shkodër, Fier dhe Elbasan, krimi i organizuar është ngulitur thellë në jetën e përditshme, duke i bërë lagjet më pak të sigurta, duke kufizuar mundësitë për biznes dhe duke rritur çmimet e pasurive të paluajtshme për shkak të pastrimit të parave”, citohet në raport dhe shtohet se ngulitja e krimit të organizuar në sektorët legjitimë të ekonomisë, duke normalizuar pasurinë kriminale dhe duke ndikuar në ndjenjën e pasigurisë, bën që të rinj pa mbështetje familjare apo institucionale të përfshihen në krim.

Një tjetër shqetësim që është ngritur është edhe përfshirja e grave dhe vajzave në krimin e organizuar. Pjesëmarrësit kanë shprehur shqetësim se vajzat e pambrojtura shpesh manipulohen ose rekrutohen nga rrjetet kriminale për shkak të problemeve në familje, mungesës së mbështetjes nga të afërmit dhe presioneve shoqërore.

Të intervistuarit kanë konstatuar pastrimin e parave nga krimi i organizuar dhe ndikimin në çdo sektor, deri te fëmijët dhe të rinjtë, ku sipas tyre, nxënësit e shkollave dukshëm përdorin lëndë narkotike.

Artan Gjergji, ekspert i tregjeve financiare, thotë për BIRN se krimi i organizuar ka ardhur duke rritur ndikimin e tij në ekonominë e vendit gjithnjë e më tepër. Gjergji i cilëson të “jashtëzakonshme” të ardhurat nga aktivitetet kriminale dhe shton se për këto grupe kriminale është domosdoshmëri që t’i alokojnë këto fonde në para cash. Ai thekson se sasia shumë e madhe e valutave të huaja që kanë hyrë në Shqipëri ka sjellë një vlerësim fiktiv të monedhës kombëtare, Lek, në tregun vendas.

Sipas tij, të ardhurat e krimit të organizuar, që më parë kufizoheshin në konsumin luksoz të familjeve apo investime të thjeshta, tashmë janë kthyer në një burim të rëndësishëm të financimeve luksoze në projekte madhore me vlera qindra miliona euro.

“Tirana dhe qytetet e tjera të mëdha janë të mbushura me investime infrastrukturore qindra miliona euroshe, financuesit e të cilëve nuk janë publikë (ka mungesë transparence), dhe për më tepër askush nuk u kërkon asnjë informacion në lidhje me burimin e fondeve të financimit”, deklaron eksperti Gjergji, ndërsa shton se tashmë anëtarët e krimit të organizuar marrin pjesë në tendera publikë në vlera të mëdha, duke pasur ndikim të trefishtë: në pastrimin e parave, në rritjen e korrupsionit me administratën publike dhe në krijimin e një ure bashkuese të trafikut të influencave mes krimit të organizuar dhe klasës politike.

Sipas tij, krimi i organizuar, për të pastruar paratë, ka penetruar edhe në sistemin financiar dhe bankar, duke përdorur sektorin e mikrofinancës dhe bankat për të marrë kredi financuese për projektet e tyre të investimit, si dhe nëpërmjet rritjes në mënyrë fiktive të të ardhurave nga këto investime. Sipas Gjergjit, kjo ndodh për shkak të mungesës së kontrollit financiar dhe tatimor.

Në vijim, Gjergji e cilëson krimin e organizuar si blerës ose kompromentues të sistemeve të pavarura: pushtetit gjyqësor, atij mediatik, si dhe të politikës. Ai sjell në vëmendje se arrestimet e SPAK kanë vërtetuar ndikimin e krimit të organizuar në administratën publike në dhjetëvjeçarin e fundit, që ka qenë në nivelet e “kapjes së shtetit”.

Rënia e besimit te media

Sipas hulumtimit, një e pesta e qytetarëve shqiptarë beson se media nuk është aspak e besueshme në raportimin e çështjeve që lidhen me korrupsionin dhe krimin e organizuar. Gjashtë nga dhjetë të intervistuar kanë pohuar se njëanshmëria në raportim është arsyeja kryesore pse i konsiderojnë të pabesueshme lajmet mbi korrupsionin dhe krimin e organizuar, ndërsa 62% besojnë se ndikimi nga persona ose grupe me pushtet e bën median të pabesueshme. Të intervistuarit kanë kërkuar që media të zhvendosë fokusin drejt raportimeve më konstruktive dhe të luajë një rol më të përgjegjshëm në formësimin e perceptimeve publike mbi krimin dhe korrupsionin.

Nga hulumtimi është konstatuar një perceptim se media i lartëson kriminelët, ndikohet nga interesa politike dhe kriminale dhe nuk promovon modele pozitive në shoqëri.

Shumica e pjesëmarrësve treguan se ekspozimi i vazhdueshëm ndaj lajmeve për krimin dhe korrupsionin ndikon negativisht në gjendjen e tyre mendore, duke shkaktuar ndjenja pafuqie dhe acarim.

Elvin Luku, profesor i asociuar në Departamentin e Gazetarisë në Universitetin e Tiranës, thotë për BIRN se skemat korruptive nga eksponentë të administratës publike apo grupet kriminale kanë përfshirë edhe mediat, me qëllim kontrollin e tyre dhe manipulimin e opinionit publik. Sipas tij, rezulton se hapësirat e mediave tradicionale për të kryer investigime me qëllim zbulimin e rasteve të korrupsionit janë ngushtuar ndjeshëm.

Luku shton se mediat që kryejnë investigime për të zbardhur apo hetuar skema korrupsioni janë ato në formën e OJF-ve me donacione të huaja, ku liria e gazetarëve për të kryer në mënyrë profesionale punën gazetareske është shumë herë më e madhe.

“Fakti që, në jo pak raste, këto investigime kryhen nga gazetarë që punojnë në mediat audiovizive, tregon se në redaksitë e këtyre mediave ata nuk gjejnë lirinë e duhur për të hetuar raste korrupsioni,” shprehet Luku.

I vetëm SPAK-u nuk mjafton

Hetimet e fundit ndaj zyrtarëve të lartë publikë të kryera nga SPAK kanë bërë që rreth 42% të anketuarve të shprehen se janë më të prirur të denoncojnë veprimet e paligjshme për shkak të këtyre hetimeve, ndërsa 40% thonë se janë bërë më të kujdesshëm në ofrimin e pagesave shtesë për shërbime.

Shqetësimi kryesor i qytetarëve që druhen të raportojnë korrupsionin është mungesa e besimit te institucionet shtetërore dhe frika se çështja nuk do të trajtohej në mënyrë anonime. Po ashtu, tjetër shqetësim i ngritur nga të rinjtë ishte edhe prirja për të mos ndëshkuar autorin e korrupsionit. Qytetarët kanë treguar raste ku detajet e personave që kishin raportuar korrupsionin iu bënë të ditura të akuzuarve.

Megjithëse ka një farë optimizmi për aftësinë e SPAK-ut për të trajtuar korrupsionin e nivelit të lartë, mbetet i përhapur zhgënjimi lidhur me efektivitetin e mekanizmave ekzistues të raportimit. Sipas hulumtimit, 62% e të intervistuarve besojnë se SPAK është efektiv në trajtimin e korrupsionit dhe krimit të organizuar në Shqipëri. Po ashtu, shumica beson se SPAK vepron në mënyrë të pavarur. Por, evidentohet se jo të gjithë qytetarët ndihen të inkurajuar nga ky institucion për të raportuar korrupsionin.

Sociologu Mërtiri shprehet se SPAK po bën realisht një punë të mrekullueshme, duke e konsideruar shumë të vështirë që në këto kushte të godasësh “përbindëshat e korrupsionit”, të fuqizuar në mënyrë të tmerrshme me pushtet, para, media dhe deri edhe nga lidhjet me krimin e organizuar. Ai thekson se, “SPAK është bërë për shumë njerëz e vetmja shpresë që disa gjëra në këtë vend të ndryshojnë, ndaj duhet mbrojtur, pasi ai po sulmohet egërsisht nga të gjithë – pozitë dhe opozitë bashkë.”

Edhe Nako thotë se SPAK nuk mund të bëjë gjithçka në kushtet kur administrata, policia dhe organet që luftojnë pastrimin e parave janë thuajse të heshtura. Eksperti Gjergji, duke nënvizuar se lufta kundër korrupsionit dhe krimit të organizuar është një mision i vështirë apo thuajse i pamundur, shprehet se duhet kohë dhe kurajë, kryesisht politike.

Edmond Hoxhaj BIRN

1...268269270...302Faqja 269 nga 302