Brace :“Nuk kam dashur të lëviz nga zona ime elektorale”

Deputeti socialist, Erion Braçe komentoi në emisionin “Shqipëria Live” lëvizjet paraelektorale në PS për zgjedhjet e 11 majit.

Ai tha se nuk ka dashur të lëvizë nga zona e tij elektorale për shkak të marrëdhënieve që ka krijuar me banorët e zonës në qarkun e Fierit.

“Braçe nuk ka lënë gjë, në harkun e vetëm një jave nuk ka dashur të lëvizë nga zona e tij elektorale dhe ka një arsye, unë nuk jam nga ata deputetët që ndërron zonë elektorale, as për t’i ikur përgjegjësive të mia, as se nuk kam përmbushur përgjegjësitë e mia, nuk jam nga ata deputetë që ndërroj numër telefoni, kam të njëjtin numër që kam pasur në Berat qëkur kanë vendosur kompanitë, s’e kam ndërruar se kjo është marrëdhënia që kam me njerëzit”, tha Braçe.

A ju thanë ju një pse?

“Nuk kam një pse, ose kam një pse që natyrisht nuk më shkon që ta marr të mirëqenë. Pse-ja ime është shumë e thjeshtë, unë e kam shumë të vështirë t’i lë njerëzit në mes të rrugës, shumë e thjeshtë, e kam po kaq të vështirë që të fshij atë që është puna ime dhe të fillojmë një gjë nga e para. Është më shumë se sa një karrige. Ka qenë shumë e vështirë për ta pranuar, është e vështirë për të lënë njerëzit”, tha Braçe.

PROKURORIA FIER DËRGON NË GJYQ 10 PERSONA TË AKUZUAR PËR PRODHIM DHE SHITJE TË LËNDËVE NARKOTIKE

PROKURORIA FIER DËRGON NË GJYQ 10 PERSONA TË AKUZUAR PËR PRODHIM DHE SHITJE TË LËNDËVE NARKOTIKEProkuroria pranë Gjykatës së Shkallës së Parë të Juridiksionit të Përgjithshëm Fier, në përfundim të hetimeve paraprake dërgon në gjyq çështjen penale nr.1300, të vitit 2023, me 10 të pandehur, shtetasit A.B., D.D, E.K., G.Ç., G.C., K.B., K.Ç, N.Ll., K.Q. dhe Xh.R., të akuzuar për kryerjen e veprës penale “Prodhimi dhe shitja e narkotikëve”, kryer në bashkëpunim dhe më shumë se një herë, parashikuar nga neni 283, paragrafi 2, i Kodit Penal. 

Kjo çështje penale nisi mbi bazën e referimit të kryer nga Drejtoria Vendore e Policisë Fier, se disa shtetas ishin të përfshirë në shitjen, blerjen e shpërndarjen e lëndëve narkotike në territorin e Bashkisë Fier. 

Në kuadër të hetimeve proaktive kryer në bashkëpunim me Drejtorinë Vendore të Policisë Fier, si përgjime, regjistrime në vende publike, etj, si dhe veprimeve të tjera hetimore, si kontrolle të banesave/vendeve, sekuestrime, këqyrje, ekspertime, marrje të deklarimeve të personave që kanë dijeni apo të pandehurve, etj, u arrit të provohej se të gjithë të pandehurit kanë shitur më shumë se një herë lëndë narkotike të llojeve kokainë, heroinë dhe cannabis sativa. 

Në vijim të hetimeve proaktive u kërkua në Gjykatën e Shkallës së Parë të Juridiksionit të Përgjithshëm Fier caktimi i masave të sigurimit “arrest në burg” ndaj të 10 personave të përfshirë, ndërsa në lidhje me faktet apo personat e tjerë që mund të jenë përfshirë në këtë veprimtari kriminale, është kryer ndarja e çështjes penale për të vijuar hetimet. 

Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale lidhur me lëndët narkotike.
 

Ngjarjet ne 24 ore ne Fier, njoftim i Policise

Drejtoria Vendore e Policisë Fier

Specialistët e Sektorit të Qarkullimit Rrugor:

-arrestuan në flagrancë shtetasit E. F., 49 vjeç, banues në Lushnjë dhe Nj. B., 59 vjeç, banues në Roskovec, pasi u kapën duke drejtuar automjetet, në gjendje të dehur;
-referuan materialet në Prokurori, ku nisi procedimi penal për shtetasin F. Zh., 23 vjeç, banues në Fier dhe për një 17-vjeçar, pasi u kapën duke drejtuar automjetet, pa leje drejtimi.

Specialistët për Hetimin e Krimeve të Komisariatit të Policisë Fier referuan materialet në Prokurori, ku nisi procedimi penal për shtetasin I. R., 51 vjeç, banues në Fier, pasi nga këqyrja e disa pamjeve filmike, rezulton se ka marrë çantën me para të një 35-vjeçari, të cilën ky shtetas e ka deklaruar të humbur.

Ditën e djeshme, shtetasi B. S., 51 vjeç, banues në fshatin Cakran, ka kallëzuar se i janë vjedhur në banesë, arma e gjahut, të cilën e posedonte me leje, dhe disa bizhuteri. Po punohet për zbardhjen e autorësisë dhe rrethanave të këtij rasti.

Materialet procedurale i kaluan Prokurorisë së Fierit, për veprime të mëtejshme.

14 vite nga 21 janari/ Familjarë, qytetarë dhe deputetë të mazhorancës, homazhe në nder të katër viktimave

Janë mbajtur homazhet në nder të katër viktimave të 21 janarit të 14 viteve më parë. 

Të pranishëm veç të afërmve dhe familjarëve të viktimave, ishin edhe deputetë të grupit parlamentar të PS, Kryetarja e Kuvendit Elisa Spiropali, ndërsa kryeministri Edi Rama nuk mori pjesë në homazhe për shkak se ndodhet jashtë vendit në Forumin e Ekonomisë në Davos të Zvicrës. 

Në ceremoni nuk kishte fjalime, por ishte projektuar në formë homazhi me heshtje dhe marshim.
Të pranishmit vendosën lule në bulevardin “Dëshmorët e kombit”, për të nderuar Ziver Veizin, Aleks Nikën, Hekuran Dedën dhe Faik Myrtajn.

Denoncimi i babait ne FIER: 40 vjeçari më ngacmon seksualisht vajzën, s’kam besim te policia, autori ka familjar në struktura

Emisioni Fiks Fare solli rastin e një të miture nga fshati Grykë i Fierit. A.M ankohet në emisionin Fiks Fare se një zotëri rreth 40 vjeç i ka ngacmuar vajzën minorene seksualisht.

Ai tregon se vajza e tij shkon nga fshati Grykë deri në Fier në shkollë, ku ndjek vitin e parë gjimanz, por që të shkojë dhe vijë deri në fshatin më të afërt shkon në këmbë dhe pastaj merr urbanin.

Sipas A.M nga momenti që vajza ka zbritur nga urbani për të ardhur në shtëpi , 40 vjeçari e ka marrë dy herë me makinë dhe e ka sjell për në fshat, madje pasi e zbret nga makina në fillim të fshatit ai e ndjek me makinë nëpër rrugica.

A.M thotë se shkova të ballafaqohem me të, por ai më goditi, për këtë arsye kanë shkuar dhe në komisariat ku edhe vajza edhe autori i dyshuar kanë dhënë dëshmitë e tyre.

“Vajza nuk tregon çfarë ka ndodhur, më lajmëroi dikush nga fshati se vajzën ma sillte ai me makinë” thotë babai.  Sipas tij vajza rri e heshtur dhe nuk tregon çfarë ka ndodhur. “Dua të dali e vërteta çfarë ka ndodhur me vajzën se ajo nuk tregon asgjë, te policia nuk kam besim sepse autori ka familjarë në strukturat e policisë”-shprehet ai.

Në një bisedë me gazetarët e Fiksit e mitura tregon se 40 vjeçari e ka marrë dy herë në makinë. “Unë hipa në makinë se është nga fshati dhe thashë do jetë shok i babit, por ai kishte qëllime të tjera, sepse herën e dytë që më mori në makinë më kërkoi numrin e telefonit, madje më tha meqë nuk ke ta blej unë” thotë e mitura.

Në bisedë me gazetarët e mitura sqaron se këtë individ e shihte çdo mëngjes në rrugë ku shkonte për shkollë dhe çdo pasdite, madje ai gjithmonë i fliste. “ Herën e dytë kur më mori me makinë, ai pasi më zbriti më doli para te rrugica tjetër dhe unë nuk e vazhdova rrugën për shtëpi  derisa dëgjova zhurmën e makinës që u largua”-tregon 16 vjeçarja.

Gazetarët e Fiksit kërkuan përgjigje në Drejtorinë Vendore të Policisë Fier për rastin. Madje ngritën pyetje konkrete për këtë institucion nëse autori i dyshuar ka familjarë të punësuar në strukturat e policisë? Pyetje e cila mbeti pa përgjigje. Policia sqaroi se Prokuroria Fier po heton për veprën penale “Ngacmim seksual” edhe pse e mitura sipas tyre ka thënë se nuk është ngacmuar seksualisht.

T/CH

Trazirat në Kapitol i çuan pas hekurave, Trump fal të akuzuarit e 6 Janarit

Pak orë pas kthimit në Shtëpinë e Bardhë, presidenti i Shteteve të Bashkuara të Amerikës, Donald Trump, nënshkroi disa urdhra ekzekutivë dhe direktiva për të vendosur vulën e tij mbi administratën e re amerikane, në çështje që përfshijnë energjinë, faljet penale dhe imigracionin.

Në mesin e urdhrave të parë ishte një falje e përgjithshme e mbi 1.500 personave të akuzuar për krime në trazirat e 6 janarit të vitit 2021 në Kapitolin e SHBA-së.

Në mesin e atyre që do të përfitojnë nga kjo falje janë edhe të dënuarit për sulme ndaj zyrtarëve policorë.

Veprimi i Trumpit, vetëm disa orë pas kthimit në Shtëpinë e Bardhë, hap rrugën për lirimin nga burgu të atyre që janë shpallur fajtorë për sulme të dhunshme ndaj policisë, si dhe drejtuesve të grupeve ekstreme të djathta të dënuar për komplotet e dështuara për të mbajtur në pushtet republikanin pasi humbi zgjedhjet e 2020-tës ndaj ish-presidentit, Joe Biden.

Demokratët kritikuan ashpër vendimin për të përfshirë në falje edhe protestuesit e dhunshëm, krimet e shumë prej të cilëve u kapën në kamera dhe u transmetuan drejtpërdrejt në televizione.

Trump kishte sugjeruar në javët para rikthimit në Shtëpinë e Bardhë se në vend të faljeve të përgjithshme, ai do t’i shqyrtonte të gjitha rastet e të akuzuarve të 6 janarit një pas një. Ndërsa zëvendëspresidenti JD Vance kishte thënë vetëm disa ditë më parë se njerëzit përgjegjës për dhunën gjatë trazirës në Kapitol “natyrisht” nuk duhej të falnin.

Trumpi, 78 vjeç, bëri betimin si president të hënën në ndërtesën e Kapitolit dhe, gjatë ceremonisë, ai e portretizoi veten si një shpëtimtar të zgjedhur nga Zoti për të shpëtuar një komb në rënie.

“Unë u shpëtova nga Zoti për ta bërë Amerikën të madhe sërish”, tha ai.

Menjëherë pas betimit të tij si president, autoritetet kufitare të SHBA-së pezulluan një program që lejonte qindra mijëra migrantë të hynin ligjërisht në SHBA përmes planifikimit të një takimi përmes një aplikacioni telefoni. Takimet ekzistuese u anuluan.

Afro 1.660 afganë që ishin miratuar nga qeveria amerikane për të emigruar në SHBA, përfshirë anëtarë të familjeve të personelit ushtarak amerikan aktiv, panë se fluturimet e tyre u anuluan si pasojë e një urdhri të Trumpit që pezullonte programet e refugjatëve në SHBA, tha një zyrtar amerikan dhe një avokat për zhvendosjen e refugjatëve.

Në Shtëpinë e Bardhë, Trump nënshkroi edhe një urdhër që shpallte emergjencë kombëtare në kufirin SHBA-Meksikë, që do të çlironte fonde dhe do t’i lejonte atij të dislokonte trupa atje.

Ai nënshkroi një urdhër për t’i dhënë fund një politike që u jep shtetësinë atyre që lindin në Shtetet e Bashkuara, një veprim që me siguri do të shkaktojë një betejë të gjatë ligjore. Një urdhër tjetër ekzekutiv shpalli kartelet e drogës meksikane si organizata terroriste.

Trump tërhoqi përsëri Shtetet e Bashkuara nga Marrëveshja e Parisit për klimën, duke larguar kështu ndotësin më të madh historik në botë nga përpjekjet globale për të luftuar ndryshimet klimatike për herë të dytë brenda një dekade.

“Po heqim gjithë kancerin … të shkaktuar nga administrata Biden”, tha Trump ndërsa nënshkroi një sërë urdhrash ekzekutivë në Zyrën Ovale.

Urdhra të tjerë revokuan politikat e administratës Biden mbi inteligjencën artificiale dhe automjetet elektrike. Ai gjithashtu urdhëroi punonjësit e qeverisë të kthehen në zyrë, në vend që të punojnë nga shtëpia.

Trump nënshkroi edhe dokumente për të krijuar një “Departament për Efikasitetin Qeveritar”, një bord këshillimor i jashtëm i kryesuar nga miliarderi Elon Musk, që synon të kufizojë pjesë të mëdha të shpenzimeve qeveritare.

Në Departamentin e Shtetit, dhjetëra diplomatëve të lartë jo-partiakë iu kërkua të japin dorëheqjen si pjesë e një plani më të gjerë për të zëvendësuar nëpunësit civilë jo-partiakë me besnikë.

Trump tha në rrjetet sociale se ekipi i tij ishte në procesin e largimit të mbi 1.000 të emëruarve nga administrata Biden.

Ai gjithashtu tha se do të nxirrte urdhra për të hequr programet federale të diversitetit dhe për të kërkuar që qeveria të njohë vetëm gjinitë e përcaktuara në lindje./ REL

Përfshihet nga flakët një qendër tregtare në Vorë

Përfshihet nga flakët një qendër tregtare në Marikaj të Vorës.

Ende nuk dihen detaje sa i përket shkakut të zjarrit apo dëmet që ka shkaktuar.

Zjarrfikësit në vendngjarje, po punojnë për shuarjen e zjarrit në godinën e përbërë nga disa butiqe veshjesh.

Flakët po përhapen me shpejtësi si pasojë e erës së fortë, por e ndikuar edhe nga materialet që gjenden brenda në godinë.

14 vite nga demonstrata e PS-së, Rama: Kush po vonon drejtësinë

Kryeministri Edi Rama ka kujtuar sot 14 -vjetorin që nga ngjarja e 21 janarit 2011, ku humbën jetën katër protestues të pafajshëm. 

Në një postim në rrjetet sociale, Rama shkruan se kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë. 

““Drejtësia vonon po nuk harron”, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë…”, shkruan Rama. 

Në 21 janar 2011 mbetën të vrarë Ziver Veizi, Aleks Nika, Hekuran Deda dhe Faik Myrtaj.

1...261262263...313Faqja 262 nga 313