Kryeministri Edi Rama ka ironizuar kreun e opozitës gjatë rubrikës “Sy m’Sy”, sa i përket programit për zgjedhjet e 11 majit.Akuzave të ndjekësit në rrjete sociale se kreu i PS-së “i ka kopjuar programin”, ai i është përgjigjur me ironi.

“Do të kemi edhe një takim tjetër në Itali. Kjo e kopjimit të programit është gjëja më qesharake në botë a thuhet bëhet fjalë për kod atomik, për një kod kasaforte të një sekreti, Kodi i Da Vinçit, megjithëse u qajnë hallin pensionisteve nuk japin kontributin e tyre, deri këtu është niveli i krijesave kënetore.

Hapja e negociatave nuk lidhet me ne dhe përcaktohet si mëkat, faj i rilindjes, pro shikohet po të duash të marrësh vesh pak më shumë si funksionon BE“, tha Rama.

Komisioni Qëndror i Zgjedhjeve, ka gati kompaninë e cila do të transportojë votën për emigrantët shqiptarë. Nga 5 kompanitë ndërkombëtare, që ofrojnë shërbimin ekspres të ftuara në konkurim nga KQZ, është përzgjedhur DHL. Kjo kompani postare do të bëjë të mundur dërgimin dhe kthimin e zarfit me fletën e votimit në 85 vendet e botës ku emigrantët shqiptarë jetojnë.

Ndërkohë, një vëmendje e shtuar do duhet nga votuesit shqiptarë të cilët jetojnë në diasporë dhe kanë shprehur interes për të votuar pasi janë regjistruar në platformën PER, pasi duhet të ndodhen në shtëpi sepse zarfi zgjedhor nuk do të lihet në kutitë postare ku zakonisht qytetarë e huaj marrin faturat mujore, por do u dorëzohet personalisht votuesve.

Paraprakisht, është përllogaritur fondi me 10 milionë euro për 245 808 zarfe të cilat do t’u shpërndahen emigrantëve shqiptarë dhe kostoja e transportit të  një vote për votuesit nga diaspora do të kushtojë rreth 40 euro.

Sipas KQZ, duke filluar nga data 5 prill, në sallën e lojërave “Feti Borova”, pranë Parkut Olimpik në Tiranë, do të nisë paketimi i 245 808 zarfeve me fletët e votimit, për t’ua dërguar të gjithë emigrantëve të cilët janë regjistruar për të votuar nga vendet ku ata jetojnë. Fletët e votimit të emigrantëve të diasporës, do të përdoret i njëjti model si në Shqipëri, por me një element shtesë, ku do të jetë një shirit blu në anën e pasme.

118 leje ndërtimi ose zhvillimi, duke filluar nga kullat në qendër të Tiranës, resortet luksoze, komplekset e banimit dhe deri te punët publike, ka dhënë në dy mbledhjet e fundit të shkurtit dhe marsit, Këshilli Kombëtar i Territorit dhe Ujit. 

KKTU dha lejet e ndërtimit ose zhvillimit për 16 kulla të larta në Tiranë dhe 8 të tjera në Vlorë. Lartësia e kullave varion nga 20 deri në 47 kate. Në Tiranë dallon një super kullë 47 kate mbi tokë dhe 7 nën tokë, e quajtur “Embassy Tower” dhe do të ndërtohet përballë ambasadës amerikane, atje ku dikur ka qenë ish ambasada franceze. Kompania ndërtuese është Hanxhari Group, e cila zotërohet nga Adjon Hanxhari, djali i ndërtuesit vlonjat, Fatmir Hanxhari, i cili njihet si pronari i hotelit Vlora Internacional. 

Në Tiranë gjithashtu, nga dokumentet e publikuara nga Agjencia e Zhvillimit të Territorit, është dhënë leje për kullën 34 kate tek Bulevardi i Ri që ndërtohet nga kompania “Startek” e Lulzim Mehmetajt. 
Në Komunën e Parisit është miratuar leja e ndërtimit për një 35-katësh nga shoqëria Sara El e biznesmenit Luan Bregasit, ndërsa “Great Ring Rock” është një kullë 32 kate me kompanitë ndërtuese Albus Invest” dhe “Loraldo” sh.p.k. 

Bami Holding ka marrë lejen e ndërtimit për Barcelona Tower, 35 katëshin që do të ndërtohet ngjitur me ish Sigurimin e Shtetit, ndërkohë që janë miratuar dhe lejet për Sunrise Tower me 35 kate e  Braka Construction e biznesmenit Amarildo Braka dhe Split Tower me subjekt zhvillues shoqëritë “Artech group” dhe “Edonil Konstruksion” që përfshin dy kulla me 22 dhe 23 kate.

Të tjera kulla janë Oberon Tower e kompanisë “Ober” të ndërtuesit Orges Kushi, Sima Tower që do të ndërtohet nga shoqëritë “Sima – Comp Alb” dhe “Alb Vizion Construction”. Një tjetër kullë 21 kate në rrugën e Shkodrës që do të ndërtohet nga kompania Xhajs Tirana. 

Ndërsa po në kryeqytet dallon një kullë 26 kate të kompanisë Im Rezidence e Dajlan Avdisë. Një godinë multifunksionale i është dhënë Dulakëve përmes firmës “Concord Investment” sh.p.k, kullë e cila shkon në 31 kate në rrugën 29 nëntori. 

Sa i përket lejeve të ndërtimit në rrethe dallon ajo në Fier, ku KKT ka miratuar termocentralin që do të ndërtohet në Roskovec nga Terna dhe Gener 2 i Bashkim Ulajt, i kundërshtuar fuqishëm nga banorët dhe shoqëria civile. 

Në zonën e Vlorës, KKTU ka miratuar lejet për kullën 21 kate Flatiron of Vlora, kullën Salterra me 24 kate dhe një tjetër 28 katësh për shoqërinë Adriatik Center. Është marrë leja e ndërtimit për një kompleks turistik me objekte deri në 14 kate, ndërsa Regina Group e Vasil Bedinit ka marrë lejen për një kompleks me 11 dhe 13 kate në rrugën Zenel Murra.

Leje të tjera për t’u përmendur janë ato të parkun diellor të Spitallës për francezët e Voltalias, ndërsa në Lezhë është dhënë leje ndërtimi për fazën e dytë të “Dukagjini Resort”, hotel dhe kazino në Shëngjin.

Gjatë vitit 2024, shqiptarët kanë konsumuar më shumë internet, por më pak minuta dhe mesazhe SMS. Interneti po përdoret gjithnjë e më tepër për të komunikuar, por edhe për edukim, argëtim, apo biznes.

Të dhënat e sapopublikuara nga Autoriteti i Komunikimeve Elektronike dhe Postare tregojnë se në Shqipëri qarkullonin rreth 3.3 milionë karta aktive SIM në fund të 2024, rreth 1.4 karta SIM për banor, shifër kjo mё e lartё se mesatarja e Evropës dhe ajo botërore. Megjithatë, numri i kartave SIM rezulton të ketë rënë me 12% në krahasim me 2023.

Ndërkohë, duket se përdorimi më i madh i internetit për dërgimin e mesazheve përmes aplikacioneve si WhatsApp, po zëvendëson formën tradicionale të dërgimit të mesazheve SMS. Numri i SMS-ve të dërguara gjatë vitit 2024 ishte rreth 384 milionë, një rënie me gati 6.8% në krahasim me vitin 2023.

Nga ana tjetër, edhe numri total i përdoruesve aktivë të telefonisë celulare arriti në 2.5 milionë në 2024, nga 2.6 milionë që ishin në 2023.

Për sa i përket totalit të thirrjeve dalëse të gjeneruara nga pajtimtarët celularë në Shqipëri, në 2024 ishin rreth 3 miliardë e 970 milionë minuta, rreth 7.6% më pak se në 2024, ku totali i thirrjeve ishte 4.3 miliardë minuta.

Volumi i të dhënave të transmetuara nëpërmjet internetit në rrjetet mobile arriti në rreth 223 milionë GigaByte në vitin që lamë pas. Statistikat zyrtare tregojnë se konsumi mesatar mujor për përdorues aktiv i shërbimeve celulare gjatë periudhës tetor-dhjetor ishte 145 minuta dalëse, 13 SMS dhe 8.94 GB Internet.

Duke filluar nga janari i 2023, në treg janë vetëm dy operatorë celularë. Në muajin shkurt të këtij viti, Autoriteti i Konkurrencës hapi edhe një hetim paraprak ndaj Vodafone dhe One Albania, pas ankesave të paraqitura mbi rritjen e çmimit të paketave me pagesë. Ky hetim ka nisur me argumentin se sjellja e ndërmarrjeve mund të përbëjë kufizim të konkurrencës, pra ekziston mundësia që dy kompanitë të kenë lidhur një marrëveshje për fiksimin e çmimit, kufizimin e prodhimit, apo ndarjen e tregjeve dhe klientëve.

Në varësi të rezultatit të hetimeve, Autoriteti i Konkurrencës do të vendosë mbi sanksionimin me gjobë, apo jo të këtyre dy kompanive.

Një ngjarje e rëndë është regjistruar vetëm pak më parë në qytetin e Sarandës, teksa raportohet se një grua është plagosur me thikë nga bashkëshorti i saj.

Mësohet se ngjarja ka ndodhur në lagjen nr.4 të qytetit bregdetar, ndërsa gruaja, e identifikuar si Miranda Budini është qëlluar me thikë në bark.

Ajo është transportuar drejt spitalit të Sarandës ku mësohet se po merr ndihmën e parë dhe ndodhet jashtë rrezikut për jetën.

Sakaq, policia po vijon kërkimet për kapjen e autorit.

Fier/Informacion paraprak

Rreth orës 15:00, në bypass_in Fier-Vlorë, janë përfshirë në aksident rrugor automjetet me drejtues shtetasit A. B., E. Gj., Sh. K., A. B., V. N., R. M. dhe M. V.

Si pasojë e përplasjes janë dëmtuar dy pasagjeret, shtetaset M. Rr., 52 vjeçe dhe S. Rr., 32 vjeçe, si edhe kanë shkuar në spital për kontroll mjekësor tre prej drejtuesve, shtetasit R. M., 46 vjeç, M. V., 45 vjeç, V. N., 22 vjeçe dhe një foshnjë 1 vjeçe.

Grupi hetimor po punon për sqarimin e plotë të rrethanave dhe shkakut të aksidentit.