Kush e kërcënon SPAK? Raporti vjetor rendit 10 problemet që rrezikojnë hetimet e Prokurorisë

Në raportin vjetor të vitit që lamë pas SPAK adreson 10 problemet që ka hasur gjatë 2024.Në vend të parë qëndron presioni i jashtëm ndaj SPAK. Po kush e ushtron presionin e jashtëm sipas SPAK?

Krimi i organizuar, politika dhe aktorë mediatikë. Këta të tre janë gjurmuar nga SPAK gjatë 2024 të dyshuar që u përpoqën të cenojnë pavarësinë kushtetuese dhe bilancin e hetimeve.Në raportin që i është dorëzuar kuvendit përmenden dëmet që shkaktohen ndaj SPAK nga këto presione të kategorizuara si “ndërhyrjet e jashtme që rrezikojnë gjithashtu integritetin e prokurorëve.”

Si zgjidhje, SPAK propozon reagimin e të gjitha institucioneve që janë përgjegjëse në ruajtjen e pavarësisë dhe të prokurorëve që shërbejnë aty. Klima që përshkruan SPAK për vitin që lamë pas lidhet direkt me hetimet ndaj politikanëve dikur funksionarë të lartë, drejtues institucionesh të vënë nën hetim gjatë 2024 dhe që qartësisht pas sollën akuza publike  ndaj prokurorëve dhe nga ana tjetër edhe deklarata  nga KLP për ndalim të presioneve dhe gjuhës së urrejtjes.

E njëjta gjë ndodhi edhe pas goditjen që mori krimi i organizuar i ekspozuar sidomos nga aplikacionet Sky ECC,  një hetim që përfundoi  në gjykatën kushtetuese dhe rriti tensionin në drejtësi. Nga ana tjetër në listën e dhjetë problemeve të ndeshura, në vend të 2 qëndron vakumi ligjor për statusin e prokurorëve të posaçëm kur  ata të përfundojnë mandatin 9 vjeçar. Dhe një situatë e tillë rrezikon të  cenojnë standardin e hetimeve të kërkuara nga publiku, Kuvendi, Këshilli i Ministrave dhe ndërkombëtarët- përmendet në raport. Si problem i 3, është renditur mungesa e këshilltarëve ligjorë që vë në rrezik ndjekjen e çështjeve deri në gjykatën kushtetuese. Pa zgjidhje vazhdon edhe njohja e vendimeve penale të huaja ndaj personazheve  të botës së krimit të organizuar që mbahet nga gjykatat e zakonshme.

Për këtë SPAK kërkon ndryshim të ligjit.

Ndërkohë korrupsioni dhe krimi i organizuar vazhdon të denoncohet fare pak nga institucionet shtetërore përfshi edhe Policinë. Ndërsa mungesa e sistemit të administrimit të çështjeve, mungesa e njësisë së analizës, statusi i specialistit ndërlidhës për hetimet e përbashkëta ndërkombëtare i cili nuk duhet të trajtohet si nëpunës civil, presin ende zgjidhje. Sikurse edhe mos ekstradimi i shtetasve shqiptarë nga Emiratet e Bashkuara Arabe.

Bardhi akuzon Ramën se i ka vjedhur programin PD-së

Kreu i grupit parlamentar të Partisë Demokratike, deputeti Gazment Bardhi, akuzon kryeministrin Edi Rama si një mashtrues gjatë fushatës elektorale dhe se i ka vjedhur programin demorkatëve, duke përsëritur akuzën e ditëve të fundit të selisë blu.

Reagimi erdhi sot (7 prill) me një video-postin në llogarinë personale në rrjetin social Facebook.

Kreu politik për qarkun e Fierit për koalicionin “Aleanca për Shqipërinë Madhështore”, akuzon kryeministrin dhe kreun e PS-së për vjedhjen e programit elektoral të Partisë Demokratike.

Një mashtrues në fushatë! Ka një fjalë të urtë që thotë se “kur një klloun shkon në pallat, ai nuk bëhet mbret, por pallati bëhet cirk”.  Asgjë më shumë sesa kjo nuk i shkon Edi Ramës. 6 muaj më parë, kur ne u angazhuam për rritjen e pensioneve mbi 200 euro, na tha se po falimentonim shtetin. Tani, ka shkuar tek premtimi ynë, por që ai s’e realizon dot”, shprehet Bardhi.

Dhe më tej rendit arsyet:

“Sepse nuk do! Sepse nuk di! Sepse vjedh! Ndiqeni me zë dhe me figurë kryeministrin që mashtron dhe ndëshkojeni me votë!”, shkruan ai, teksa e shoqëron edhe me video.

https://www.facebook.com/share/v/18qrz2tMEG/?mibextid=wwXIfr

Mesazh mashtrues në Whatsapp, kërkon të votohet në një sondazh për të përfituar bursë studimi, Autoriteti për Sigurinë Kibernetike: Bëni kujdes 

Autoriteti Kombëtar për Sigurinë Kibernetike (AKSK) ka bërë thirrje qytetarëve që të kenë kujdesë nga disa mesazhe që janë duke u shpërndarë së fundmi në aplikacionin Whtasapp, pasi janë mashtrim. 

‘Një mesazh që kërkon të votohet në një sondazh po shpërndahet në rrjetin Whatsapp. Bëni kujdes, ky mesazh është mashtrues’, shkruan Autoriteti Kombëtar për Sigurinë Kibernetike.

Në mesazh kërkohet që të votohet për një sondazh për të përfituar një bursë studimi.

Përshëndetje! Ju lutem votoni Roxana Costin në këtë sondazh, ajo është vajza e një miku im, çmimi kryesor është një bursë për arsim falas për të gjithë vitin e ardhshëm, kjo është shumë e rëndësishme për të. Faleminderit shumë!’, thuhet në mesazh. 

Policia italiane zbardh dinamikën e vrasjes së shqiptarit, arrestohen babë e bir

Fontanafredda, një komunë në provincën e Pordenones, ishte skena e një episodi të rëndë lajmesh. Vladimir Topjana, një 43-vjeçar me kombësi shqiptare, banues në Cordenons dhe baba i një fëmije, u qëllua për vdekje me armë zjarri përballë “Bar Sporting”.

Vrasja ka ndodhur pak para orës 21:30, teksa klientë të shumtë brenda lokalit po ndiqnin ndeshjen Roma-Juventus. Sipas ndërtimit fillestar të ngjarjes, Topjana ishte ulur në një stol me një të afërm, kur në afërsi të lokalit mbërritën me një makinë dy burra, R.S., 34 vjeç dhe babai i tij P.S., 66 vjeç, të dy me kombësi shqiptare.

Mes tyre ka shpërthyer një debat i dhunshëm, gjatë të cilit Topjana kafshoi veshin e njërit prej dy sulmuesve, duke i shkëputur një pjesë të tij. Pas kësaj, i riu dyshohet se ka nxjerrë armën dhe ka gjuajtur dy të shtëna, duke e goditur për vdekje Topjanën në kokë.

Pas vrasjes, të dy janë larguar me makinë nga vendi i krimit. Policia nisi menjëherë kërkimet, duke arritur të përgjonte dhe ndalonte dy burrat natën mes 6 dhe 7 prillit në zonën Orsago-s, në provincën e Trevisos. Të dy u arrestuan me akuzën e vrasjes së rëndë me paramendim dhe armëmbajtjes së vjedhur.

Karabinierët po kryejnë hetime të thelluara për të rindërtuar në detaje dinamikën e ngjarjeve dhe për të përcaktuar shkaqet që çuan në sherri dhe vrasjen e më pas. Janë intervistuar dëshmitarët e pranishëm në momentin e ngjarjes dhe janë analizuar pamjet nga kamerat e vëzhgimit. Hetuesit supozojnë se viktima i ka njohur sulmuesit e tij, duke qenë se ata janë drejtuar menjëherë drejt tij sapo kanë zbritur nga makina.

Fruthi po prek të pavaksinuarit, rritet numri i të prekurve në gjithë vendin

Sëmundja e fruthit është përhapur në shumë vende të Evropës, madje edhe në fqinjët tanë, por edhe në Shqipëri gjatë muajit mars ka pasur një shpërthim të fruthit, ndaj rreziku është i lartë për fëmijët që nuk janë vaksinuar.Artan Simaku, epidemiolog i ISHP, thotë: “Për shkak të udhëtimeve, rreziku është i lartë pasi në Bosnjë, në Rumani dhe në Serbi ka mbi 10 mijë raste të infektuar”.

Ka shumë prindër që refuzojnë të bëjnë vaksinën MMR, e cila bëhet kur fëmija mbush 1 vjeç, pasi e lidhin me autizmin. Por ndërkohë ata janë rrezik edhe për fëmijët e tjerë. Në muajin mars ka pasur një shpërthim të fruthit në një kopësht në Fier, ndërkohë që raste me fruth ka pasur në Tiranë, Lezhë dhe Vau i Dejës.

Kanë qenë 14 fëmijë, 8 prej tyre në Fier, të grupmoshës 2-4 vjeç, të cilët ishin vaksinuar vetëm me një dozë të vaksinës, pra pa plotësuar skemën e plotë të vaksinimit”, shton Simaku.

Pas këtyre rasteve, epidemiologët kanë nisur verifikimin e fëmijëve të pavaksinuar nëpër çerdhe, kopshte dhe shkolla, të cilat nuk duhet të pranojnë fëmijë të pavaksinuar sipas kalendarit të detyrueshëm, por shumë institucione arsimore e shkelin dhe nuk e respektojnë këtë pikë të ligjit të sëmundjeve infektive.

Nga ana tjetër, Inspektoriati Shëndetësor Shtetëror duhet të ushtrojë kontroll dhe të ndëshkojë çerdhet, kopshte dhe shkolla që pranojnë fëmijë të pavaksinuar, duke rrezikuar të tjerët.”

Subvencionet në bujqësi, aplikimi çelet më 14 prill

Më 14 prill çelen aplikimet për skemën kombëtare të bujqësisë 2025. Duke nisur nga 14 prilli deri në fund të majit, fermerët kanë afat aplikimi për të përfituar nga skemat mbështetëse të ministrisë së bujqësisë.
Zv/ministri i Bujqësisë Dhimitër Kote nga Lushnja tha se për herë të parë do të mbështeten fermerët që prodhojnë perime bio në sera. Ndërsa për blegtorinë do t’i kushtohet vëmendje rritjes së viçave.

Ndryshe nga skemat mbështetëse paraardhëse, këtë vit janë përmirësuar skemat e mëparshme ku bie në dy subvencionimi për numër krerësh në blegtori edhe për viçat e majmërisë, lufta biologjike në sera si dhe subvencionimi për litër naftë shoqëruar nga dokumentacioni për naftën, plehërimin si dhe të tjerat.

Rritet numri i rasteve të krimit kompjuterik 

Zhvillimi i teknologjisë viteve të fundit ka thjeshtuar shtigjet për të huajt, por edhe për shqiptarët, për të zgjeruar aktivitetin e krimit kibernetik.

Sipas të dhënave nga Ministria e Brendshme, gjatë vitit të kaluar janë evidentuar 1,210 vepra penale në fushën e krimit kibernetik, ose 58% më shumë se në vitin 2023.

Shahin Dokuzi, ekspert i IT-së u shpreh se “Sulmet po rriten dita-ditës dhe po shtrihen gjerësisht në internet. Më së shumti preket sektori financiar, por së fundmi është rritur ndjeshëm edhe rreziku për sektorin e sigurisë fizike, pasi Shqipëria është pjesë e NATO-s dhe të tjerët duan ta sulmojnë. Gjithashtu janë shtuar sulmet që synojnë informacionin privat të qytetarëve në Shqipëri.”

Pjesa më e madhe e këtyre veprave penale janë zbuluar nga organet kompetente plot 732 raste, që përbëjnë 61% të totalit, ose 319 raste më shumë se një vit më parë. Kjo tregon për një efikasitet më të lartë të strukturave përgjegjëse.

“Qeveria ka marrë masa me krijimin e AKSK-së (Autoriteti Kombëtar për Sigurinë Kibernetike), duke nxitur bizneset të implementojnë të gjitha certifikimet e nevojshme për sigurinë kibernetike, si dhe duke rritur kontrollin”, tha ai.

Gjatë vitit të kaluar u realizuan 55 operacione policore në fushën e krimit kibernetik, prej të cilave 3 u zhvilluan në bashkëpunim me partnerë ndërkombëtarë.

Eksportet e bimëve mjekësore, në rrezik! – Kërkesat për qeverinë: Rimbursim 10% i TVSH, aq sa tarifa e Trump

Industria e Bimëve Mjekësore dhe Aromatike të Shqipërisë, në një deklaratë për median lidhur me vendosjen e tarifës 10% nga presidenti Amerikan Donald Trump për eksportet shqiptare drejt Shteteve të Bashkuara të Amerikës, i ka propozuar një plan masash për të normalizuar situatën.

Paketa mbështetëse që IBMA kërkon për fermerët përfshin, rimbursimin e plotë të TVSH-së në masën 10% për të gjithë fermerët e këtij sektori, kompensimin e humbjeve nga zhvlerësimi i kursit euro/dollar, përmes një mekanizmi të stabilizuar, zbritje tatimore për kompanitë eksportuese që respektojnë standarde të larta cilësore, heqjen e tatimit mbi pagat deri në 80,000 lekë për punonjësit sezonalë, si dhe një sërë pikash të tjera që synojnë lehtësimin e barrës për prodhuesit vendas.

Në deklaratën e saj, IBMA thekson se mbetet e angazhuar për të ruajtur dhe forcuar marrëdhëniet pozitive ekonomike me SHBA-në, duke shprehur gatishmëri për bashkëpunim konstruktiv nga të gjitha palët për të gjetur zgjidhje afatgjata dhe të qëndrueshme.

Vendosja e tarifës 10% për eksportet shqiptare përkthehet në rritje të kostove për kompanitë eksportuese, gjë që mund të ndikojë drejtpërdrejt në çmimin final të produkteve në tregun amerikan, duke i bërë ato më pak konkurruese.
Si pasojë, pritet një rënie e kërkesës për produktet shqiptare, ulje e vëllimit të eksporteve, si dhe humbje të konsiderueshme për mijëra fermerë dhe biznese të vogla në zonat rurale.

Ndërkohë, kompanitë që kanë investuar në teknologji dhe cilësi për të përmbushur standardet amerikane, tani përballen me një klimë pasigurie financiare, çka mund të ngadalësojë ndjeshëm zhvillimin e sektorit.

SCANTV

1...245246247...365Faqja 246 nga 365