SKY ECC” shkatërron dy grupe kri*inale në Greqi, 4 në pranga e 2 në kërkim për trafik…

Disa muaj pas dy operacioneve të njëpasnjëshme në Greqi që çuan në goditjen e dy grupeve të trafikut ndërkombëtar të drogës, të zbuluara pas komunikimeve në “SKY ECC”, policia greke ka zhvilluar operacionin e tretë.Sërish në skenë kanë dalë përdorues shqiptarë të platformës, duke çuar në zbulimin e dy grupeve të tjera kriminale që kanë vepruar në vitet 2020–2021.

4 persona janë arrestuar dhe 2 të tjerë janë shpallur në kërkim, si pjesë e dy grupeve kriminale, në përbërje të së cilës ishte edhe një oficer i lartë i policisë greke.

Nga mbledhja, korrelacioni dhe vlerësimi i përmbajtjes së komunikimeve të bëra përmes aplikacionit online “Sky ECC”, në kombinim me materialet e tjera para-hetimore, u bë e mundur që autoritetet të identifikonin disa nga pronarët e vërtetë të kodeve specifike PIN të aplikacionit “Sky ECC”, të cilët janë anëtarët e mbetur të grupeve kriminale. Lidhur me individët e dyshuar, nga komunikimet (mesazhe me shkrim dhe audio, shkëmbim fotosh) përmes aplikacionit online “Sky ECC”, dolën indikacione të forta për përfshirjen e tyre, me role të rëndësishme, në rrjete ndërkombëtare për furnizimin dhe ruajtjen e sasive të mëdha të lëndëve narkotike (marihuanë dhe kokainë), me qëllim përfundimtar trafikimin e tyre në territorin grek, si dhe blerjet dhe shitjet e paligjshme të armëve të zjarrit (pistoleta dhe armë luftarake).

Gjatë operacionit që u krye, si dhe nga kontrollet e kryera në shtëpi dhe automjete, u gjetën dhe u sekuestruan 41.365 euro, 6 telefona celularë, një automjet që përdorej si mjet për kryerjen e trafikut të drogës, si dhe një kartë e Policisë me të dhënat e oficerit të policisë, e cila ishte deklaruar e humbur prej tij.

Oficeri grek bashkëpunonte me shqiptarin Mario Diamanti

Oficeri 56-vjeçar grek, rezulton të ketë dalë në pension me gradën Nënkolonel A në dhjetor 2024 dhe deri atëherë shërbeu në Shërbimet e Sigurisë së Athinës Perëndimore dhe më pas në Drejtorinë e Policisë Athinë.

Oficeri në pension doli në pah nga pjesëmarrja e tij aktive në rrjetin kriminal ndërkombëtar të trafikut të drogës të udhëhequr nga shqiptari Marius Diamanti alias Mario Diamanti nga Delvina, i cili u vra në nëntor 2021 jashtë një karburanti që ai zotëronte, në Nikaia të Athinës.Oficeri i policisë kishte ndërmjetësuar gjithashtu për blerjen dhe shitjen e paligjshme të kallashnikovëve nga një person i panjohur për Mario Diamantin. Në të njëjtën kohë, ishte zbuluar pjesëmarrja aktive e oficerit të policisë në rrjetin kriminal ndërkombëtar të trafikut të drogës që përfshinte edhe një emigrant nga Gjeorgjia, të cilit ai njëkohësisht i “siguroi” përmbushjen e paligjshme dhe të dukshme të kushteve të tij kufizuese, ndërsa i dha informacion dhe udhëzime shqiptarit dhe emigrantit nga Gjeorgjia për të shmangur arrestimin e tyre.

Marius Diamanti alias Mario Diamanti, u ekzekutua më 16 nëntor 2021 jashtë karburantit të tij në Nikaia, Athinë. Diamanti kishte qenë i arrestuar më parë për një sasi kokaine që iu gjet në makinë.

Ai ishte akuzuar edhe për vrasjen e një 30-vjeçari shqiptar më 14 shkurt 2010 në rrugën Fokionos Negri në Kypseli, por pas shumë hetimesh ai u shpall i pafajshëm, ndonëse arma që u gjet në vendin e ngjarjes kishte qenë e njëjtë me atë që iu gjet Diamantit gjatë arrestimit.

Po ashtu, ai përmendet si i arrestuar edhe për një ngjarje kriminale në Mykonos, por edhe në këtë rast ishte lënë me detyrim paraqitje. Emri i Diamantit u përfol edhe në dosjen e madhe të një grupi falsifikatorësh që kishin pajisur me identitete të rreme trafikantë e vrasës shqiptarë në Greqi, nga ku Diamanti kishte përfituar identitetin Stergios Maznevidis. Në maj 2023, Diamanti u akuzua pas vdekjes, se ishte autori i vrasjes së trafikantit belg Kristof Waegeman më 29 maj 2020 në Voula, Athinë. Ai u qëllua me dy plumba në kokë.

Në vitin 2015, Waegeman është dënuar në Belgjikë me 12 vjet burg për trafik kokaine nga Amerika Latine përmes portit të Antwerp. Waegeman ishte gjithashtu një nga të dyshuarit e dosjes “Mackerel”, ku hetohej trafiku i kokainës nga grupi i Abdelilah EM alias Black, i cili ndodhet në Dubai. Në këtë dosje, Waegeman njihet me emrin Geert Nelle.

Evropa përfshihet nga një tjetër valë i nxehti! Al*rm në Itali, Francë, Spanjë dhe Ballkan

Evropa po përballet me një tjetër valë të fuqishme të nxehti, me temperatura ekstreme që kanë detyruar autoritetet në disa shtete të shpallin alarme të nivelit të lartë. Italia dhe Franca janë ndër vendet më të prekura, ndërsa vala e të nxehtit po përhapet gjithashtu në Spanjë, Portugali dhe Ballkan.

Në Itali, rreth 20 qytete, përfshirë Romën dhe Venecian, janë vendosur në “alarm të kuq” nga Ministria e Shëndetësisë për fundjavën, për shkak të temperaturave që përbëjnë rrezik për të gjithë popullatën, jo vetëm për grupet e ndjeshme. Italia mban ende rekordin për temperaturën më të lartë të regjistruar ndonjëherë në Evropën kontinentale: 48.8°C në vitin 2021.

Në Francë, katër rajone mesdhetare (Bouches-du-Rhône, Gard, Hérault dhe Pyrénées-Orientales) janë në “alarm portokalli” për shkak të temperaturave të larta, që pritet të arrijnë deri në 39°C gjatë fundjavës, ndërsa netët do të jenë po ashtu të nxehta për shkak të temperaturave të larta të ujit në Mesdhe. Në total, 14 rajone franceze janë aktualisht në alarm për mot ekstrem.



Në jug të Spanjës, meteorologët parashikojnë temperatura deri në 42°C, me ditët më kritike të parashikuara për të dielën dhe të hënën. Netët pritet të jenë të papërballueshme, me temperatura që nuk zbresin nën 25°C.
Edhe Portugalia është përfshirë nga vala e të nxehtit. Të dielën, dy të tretat e territorit do të jenë në alarm portokalli, me 42°C të parashikuara në kryeqytetin Lisbonë dhe rrezik maksimal për zjarre në natyrë.

Ballkani nuk ka mbetur jashtë kësaj vale. Në Serbi, temperaturat gjatë ditës së premte kanë shkuar deri në 39°C, afërsisht 10 gradë mbi mesataren sezonale. Autoritetet po bëjnë thirrje për kujdes të shtuar, ndërsa valët e të nxehtit pritet të përshkallëzohen edhe në ditët në vijim.
Ekspertët paralajmërojnë se kjo valë është një ndër më të hershmet e regjistruara në dekadat e fundit dhe mund të zgjasë më gjatë se zakonisht, me pasoja të drejtpërdrejta për shëndetin publik dhe mjedisin.

SPAK përfundon hetimet dhe çon çështjen në GJKKO për dy persona ne FIER

Prokuroria e Posaçme Kundër Korrupsionit dhe Krimit të Organizuar ka përfunduar hetimet dhe ka dërguar në Gjykatën e Posaçme një rast për korrupsion në zgjedhjet e 11 majit.

Me anë të një njoftimi zyrtar SPAK thotë se janë marrë të pandehur Pandeli Bozha dhe Vladimir Lushkaj. Bozha akuzohet për veprën penale të “Korrupsionit aktiv në zgjedhje”, ndërsa Lushkaj për “Korrupsion pasiv në zgjedhje”.

“Gjatë procesit hetimor, nga kqyrja e pamjeve filmike dhe veprimet procedurale të autorizuara nga prokurori është dokumentuar një episod i datës 08.05.2025, rreth orës 10:00, kur shtetasi Pandeli Bozha ka shkuar në banesën e shtetasit Vladimir Lushkaj. Në këtë takim, Pandeli Bozha i ka futur në xhep një kartëmonedhë dhe i ka treguar një fletë të ngjashme me atë të votimit, duke i sugjeruar emrin e kandidatit për të cilin duhet të votonte”, thuhet ne njoftimin e SPAK.

Njoftimi i SPAK

Prokuroria e Posaçme Kundër Korrupsionit dhe Krimit të Organizuar përfundoi hetimet dhe dërgoi në Gjykatën e Posaçme kërkesën për gjykim të procedimit penal nr.60/1 të vitit 2025, në ngarkim të të pandehurve:

Pandeli Bozha – i akuzuar për veprën penale “Korrupsion aktiv në zgjedhje”, i parashikuar nga nenet 328 i Kodit Penal
Vladimir Lushkaj – i akuzuar për veprën penale të “Korrupsionit pasiv në zgjedhje”, i parashikuar nga neni 328/b i Kodit Penal.
Hetimet për këtë procedim penal janë zhvilluar përmes metodave proaktive.

Gjatë procesit hetimor, nga kqyrja e pamjeve filmike dhe veprimet procedurale të autorizuara nga prokurori është dokumentuar një episod i datës 08.05.2025, rreth orës 10:00, kur shtetasi Pandeli Bozha ka shkuar në banesën e shtetasit Vladimir Lushkaj. Në këtë takim, Pandeli Bozha i ka futur në xhep një kartëmonedhë dhe i ka treguar një fletë të ngjashme me atë të votimit, duke i sugjeruar emrin e kandidatit për të cilin duhet të votonte.Pas marrjes në pyetje, shtetasi Vladimir Lushkaj ka dorëzuar pranë oficerëve të policisë gjyqësore kartëmonedhën dhe një fletë të ngjashme me atë të votimit, ku emri i kandidatit për deputet ishte theksuar me ngjyrë portokalli. Këto materiale janë sekuestruar si prova në kuadër të këtij procedimi penal.

Nga tërësia e veprimeve hetimore ka rezultuar se veprimet e dokumentuara përmbushin elementë të veprave penale të “Korrupsionit aktiv në zgjedhje” dhe Korrupsion pasiv në zgjedhje”, të parashikuara respektivisht nga nenet 328 dhe 328/b të Kodit Penal.

33-vjeçari hap zjarr drejt grupit të të rinjve, përfundon në pranga

Një ngjarje e rëndë është regjistruar në fshatin Theth të Shkodrës, ku ndërhyrja në kohë e Policisë ka parandaluar përshkallëzimin e një konflikti mes disa shtetasve.

Sipas njoftimit zyrtar, 33-vjeçari A. Rr. është arrestuar pasi ka qëlluar me armë zjarri në drejtim të një automjeti me të cilin po udhëtonin tre shtetas – N. H., 29 vjeç, P. H., 27 vjeç dhe D. Rr., 29 vjeç – të gjithë banues në Theth. Për fat të mirë, nga të shtënat nuk ka pasur të lënduar, por vetëm dëme materiale në mjetin e qëlluar.

Pas incidentit, tre personat e mësipërm dyshohet se kanë ushtruar dhunë fizike ndaj 33-vjeçarit, për çka janë proceduar penalisht në gjendje të lirë.

Gjatë veprimeve hetimore është sekuestruar edhe arma e përdorur në konflikt – një pistoletë me municion luftarak.

Adriatik Lapaj paraqitet në SPAK

Kandidati për deputet Adriatik Lapaj është paraqitur në SPAK këtë të premte Avokati i deputetit deklaroi në gjykatë se ka kërkuar informacion nga disa banka dhe nga kadastra lidhur me të dhënat që lidhen me Adriatik Lapajn.

Gjithashtu, ai shtoi se Lapaj ka pasur një marrëdhënie kontraktuale me kompaninë “Merkaj”, pronarët e së cilës janë aktualisht nën hetim nga SPAK.

Arrestime dhe ndjekje penale per disa shtetas nga policia FIER

Drejtoria Vendore e Policisë Fier

Specialistët për Hetimin e Narkotikëve arrestuan në flagrancë shtetasin K. K., 25 vjeç, banues në Lushnjë, pasi gjatë kontrollit fizik dhe atij në banesë, iu gjetën doza Cannabisi të gatshme për shitje.

Specialistët e Sektorit të Qarkullimit Rrugor arrestuan në flagrancë shtetasin A. Z., 50 vjeç, banues në Fier, pasi u kap duke drejtuar automjetin, në gjendje të dehur.

Specialistët për Hetimin e Krimeve të Komisariatit të Policisë Lushnjë:
-arrestuan në flagrancë shtetasin S. B., 25 vjeç, banues në fshatin Golem i Madh, si dhe referuan materialet në Prokurori, ku nisi procedimi në gjëndje të lirë për babanë e tij, shtetasin Th. B., 65 vjeç, dhe për shtetasin M. C., 70 vjeç, pasi dyshohet se janë konfliktuar me njëri-tjetrin, me sende të forta, për motive të dobëta. Gjatë konfliktit, 2 shtetasit dyshohet se i kanë dëmtuar automjetin, 70-vjeçarit;
-referuan materialet në Prokurori, ku nisi procedimi penal për një shtetas 14 vjeç, banues në Himarë, pasi dyshohet se ka kanosur me mjet prerës, një shtetas 11 vjeç, banues në Lushnjë.

Shërbimet e komisariateve të Policisë Fier dhe Mallakastër referuan materialet në Prokurori, ku nisi procedimi në gjendje të lirë për shtetasit P. A., 58 vjeç, M. Ç., 51 vjeç dhe T. Ç., 61 vjeç, për veprën penale “Ndërtimi i paligjshëm”.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

Shqipëria është përballur me 18 vatra zjarri në të paktën 12 bashki të vendit

Në 24 orët e fundit, Shqipëria është përballur me 18 vatra zjarri në të paktën 12 bashki të vendit, duke përfshirë Vlorën, Sarandën, Ksamilin, Delvinën, Vau i Dejësin, Malësinë e Madhe, Tiranën, Kavajën, Beratin, Kuçovën, Skraparin dhe Elbasanin.

Falë ndërhyrjes së shpejtë të strukturave operacionale, të gjitha vatrat janë shuar pa shkaktuar dëme në njerëz, banesa apo gjënë e gjallë. Megjithatë, flakët kanë përfshirë rreth 35.9 hektarë sipërfaqe me shkurre dhe barishte.

Në operacionet për shuarjen e zjarreve u angazhuan 266 efektivë, 35 automjete zjarrfikëse dhe helikopteri Cougar i Forcave të Armatosura. Në jug të vendit, Forca Ajrore ka shtuar mbikëqyrjen ajrore me dronë, duke ofruar vëzhgim të vazhdueshëm ditor dhe nate mbi zonat më të rrezikuara.

Mbrojtja Civile ka deklaruar se mbetet e angazhuar në monitorimin dhe përballimin e çdo situate emergjente në nivel vendor dhe qendror.

Ndërkohë, mëngjesin e sotëm u regjistruan edhe dy lëkundje tërmeti: një me magnitudë 3.9 Rihter në Fushë-Krujë me thellësi 15 km, dhe një tjetër me magnitudë 3.8 në Zall-Herr, Tiranë. Nuk raportohet për dëme në njerëz apo objekte.

Për ditën e sotme, IGJEUM parashikon reshje të dobëta në qarqet Shkodër, Kukës, Dibër, Elbasan dhe Korçë, ndërsa për rrezikun nga zjarret, qarku Fier klasifikohet me nivel “të lartë”, ndërsa qarqet e tjerë me “rrezik të moderuar”.

Autoritetet i bëjnë thirrje qytetarëve të tregojnë kujdes të shtuar gjatë ditëve me temperatura të larta dhe të raportojnë menjëherë çdo vënie në rrezik pranë institucioneve vendore.

Zgjedhjet e 11 majit, KQZ shpërndan mandatet për 4 qarqe

KQZ shpërndan mandatet për qarqet Vlorë, Shkodër, Berat dhe Dibër.Në qarkun e Beratit, PS ka marrë 5 mandate, koalicioni opozitar ‘PD-ASHM’ 2 mandate.

Në qarkun e Dibrës, PS ka marrë 3 mandate, koalicioni opozitar ‘PD-ASHM’ 2 mandate.Në Shkodër koalicioni opozitar ‘PD-ASHM’ ka marrë 5 mandate, PS 4 mandate, PSD 2 mandate.

Ndërsa në qarkun e Vlorës, PS ka siguruar 9 mandate, ‘PD-ASHM’ 3 mandate.

1...217218219...305Faqja 218 nga 305