Drejtoria e Përgjithshme e Shërbimeve të Transportit Rrugor (DPSHTRR) ka publikuar raportin zyrtar për periudhën Janar–Korrik 2025 mbi kontrollet teknike të automjeteve në të gjithë vendin. Nga 167.046 mjete të testuara, 24.3% kanë dështuar në testimin teknik, duke treguar një rritje të ndjeshme të automjeteve të papërshtatshme për qarkullim.

Sipas të dhënave, 4.577 automjete, me një moshë mesatare 22 vjeç, janë çregjistruar përfundimisht, pasi nuk kanë përmbushur kushtet minimale teknike për të lëvizur në rrugë. Ky numër sinjalizon për nevojën urgjente të rinovimit të flotës rrugore, sidomos për automjetet e vjetra që përbëjnë rrezik real për sigurinë rrugore dhe ndotjen mjedisore.

Arsyet kryesore të ngeljes në kontrollin teknik:

• 37.8% – Problemet me sistemin e shkarkimit të gazrave (ndotje e lartë e ajrit)
• 34.9% – Mangësi vizuale dhe funksionale (drita, pasqyra, elementë të jashtëm)
• 14.8% – Defekte në sistemin e frenimit
• 13% – Probleme me sistemin e drejtimit

Qarku me më shumë kontrolle:

• Tirana mban vendin e parë me 35.6% të testimeve
• Pasojnë Durrësi dhe Fieri, për shkak të dendësisë më të lartë të popullsisë dhe mjeteve.
• Gjirokastra ka numrin më të ulët të mjeteve të testuara.

DPSHTRR kujton qytetarët:

• Ndalohen rreptësisht ndërhyrjet në odometër, modifikimet konstruktive dhe çdo ndërhyrje tjetër që cenon sigurinë rrugore.
• Kontrolli teknik mund të rezervohet online përmes e-Albania për të shmangur vonesat dhe pritjet.

Ky raport ngre shqetësimin për një pjesë të madhe të automjeteve që, për shkak të amortizimit, nuk arrijnë të përmbushin standardet e sigurisë, duke sjellë rreziqe të shtuara në rrugë dhe ndotje të konsiderueshme të ajrit. Autoritetet apelojnë për kujdes më të madh të pronarëve, si dhe masa shtesë për rigjenerimin e parkut automjetik në Shqipëri.

Gjykata e Apelit të Juridiksionit të Përgjithshëm ka lënë në fuqi masën “arrest me burg” për ish-drejtorin e “Bankers Petroleum”, Leonidha Çobo, dhe drejtorin aktual, shtetasin kinez Hongping Xiao. Seanca u zhvillua të martën, ku ishte i pranishëm edhe përfaqësuesi i ambasadës kineze në Tiranë.

Të arrestuarit kishin kundërshtuar masat e sigurisë të vendosura më parë nga Gjykata e Fierit, por Apeli rrëzoi kërkesat e tyre, duke mbështetur qëndrimin e Prokurorisë. Megjithatë, për disa zyrtarë të tjerë të përfshirë në hetime, Gjykata e Apelit zbuti masat e sigurisë.

Nga pesë masat “arrest shtëpie”, vetëm njëra u ndryshua në “detyrim paraqitjeje”, për shkak të rrethanave familjare, pasi një prej të dyshuarve është prind i një fëmije 2-vjeçar. Ndërsa për tre persona të tjerë u hoq masa e ndalimit të daljes jashtë vendit, duke lënë në fuqi vetëm detyrimin për t’u paraqitur në polici gjyqësore.

Në total, dhjetë zyrtarë dhe ish-zyrtarë të kompanisë ndodhen nën hetim për një sërë veprash penale të rënda, të lidhura me një skemë të dyshuar mashtrimi financiar që ka dëmtuar rëndë buxhetin e shtetit shqiptar. Sipas Prokurorisë, të pandehurit kanë ngritur një skemë të sofistikuar për shmangien e detyrimeve tatimore, përfitime këto të paligjshme që kapin miliona euro. Fitimet e padeklaruara dyshohet se janë pastruar më pas përmes mekanizmave të pastrimit të parave.

Personat e hetuar dhe në kërkim akuzohen për veprat penale:

“Krijimi i skemave mashtruese lidhur me tatimin mbi vlerën e shtuar” (neni 144/a),

“Fshehja e të ardhurave” (neni 180/3),

“Pastrimi i produkteve të veprës penale ose veprimtarisë kriminale” (neni 287),

“Shpërdorimi i detyrës” (neni 248),

“Moskryerja e detyrave nga organet tatimore” (neni 181/a).

Hetimet për këtë çështje vijojnë, dhe autoritetet shqiptare nuk përjashtojnë mundësinë e zgjerimit të tyre edhe ndaj institucioneve të tjera që mund të kenë pasur lidhje me aktivitetin e kompanisë gjatë periudhës së hetuar.

Reshje të dendura shiu përmbytin qytetin, shpallet gjendja e emergjencës

Qyteti i Vlorës është përfshirë nga reshje të dendura shiu, të cilat kanë nisur rreth 30 minuta më parë, duke shkaktuar përmbytje në disa zona urbane. Siç tregojnë pamjet nga terreni, niveli i ujit në rrugë është rritur ndjeshëm, duke vështirësuar qarkullimin dhe shkaktuar probleme për qytetarët dhe bizneset.

Përballë kësaj situate, Bashkia e Vlorës ka shpallur gjendjen e emergjencës, duke aktivizuar strukturat e emergjencave civile dhe grupet e punës në terren. Po punohet për normalizimin e situatës dhe për të evituar përkeqësimin e saj në orët në vijim.

Autoritetet u bëjnë thirrje qytetarëve të kufizojnë lëvizjet dhe të shmangin zonat me rrezik përmbytjeje, ndërsa apelojnë për bashkëpunim në përballimin e kësaj emergjence natyrore.

Një aksident i shumëfishtë ka ndodhur pasditen e sotme në autostradën Fier-Lushnje, në afërsi të “Pushimit të shoferit”.

Disa mjete u përplasën mes tyre duke pësuar dëme të konsiderueshme materiale.  Ndër mjetet e përfshira në aksident ishte dhe një autobot që transportonte çimento, i cili sic shihet nga pamjet është përmbysur gjatë përplasjes.

Mësohet se të plagosur kanë mbetur 2 persona të cilët janë dërguar për ndihmë të specializuar mjekësore në spitalin e Lushnjës.

Policia e qarkullimit po devijon trafikun në një kalim rruge dytësore

Çështja “Bankers”, Gjykata e Apelit shtyn për nesër vendimin për masat e sigurisë.

Vendimi do te shpallet ne oren 10:00, avokatet e te dyshuarve sapo kane perfunduar mbrojten dhe parashtrimet e tyre mbi ankimin per masat e sigurise qe u caktuan nga gjykata e Fierit

Pasditen e sotme, qyteti i Fierit është mbuluar nga re të dendura tymi, si pasojë e dy vatrave të mëdha zjarri që kanë shpërthyer në zona të ndryshme të territorit. Njëri zjarr është regjistruar pranë fshatit Daullas, ndërsa tjetri në periferinë e qytetit, duke përfshirë sipërfaqe të mëdha me toka bujqësore dhe kallamishte.

Flakët janë përhapur me shpejtësi për shkak të erës së fortë, e cila po pengon edhe punën e forcave zjarrfikëse të angazhuara në terren. Ekipet po punojnë në kushte të vështira për të vënë nën kontroll situatën, ndërkohë që tymi është përhapur deri në zonat urbane të Fierit, duke shkaktuar shqetësim te banorët.

Shkaqet e zjarreve mbeten ende të paqarta, ndërsa autoritetet lokale i kanë bërë apel qytetarëve të tregojnë kujdes të shtuar, duke shmangur çdo veprim që mund të nxisë përhapjen e zjarreve, sidomos në kushtet aktuale të temperaturave të larta dhe thatësirës së tejzgjatur.

Për momentin, situata është nën monitorim të vazhdueshëm, ndërsa përpjekjet për neutralizimin e flakëve po vijojnë në mënyrë intensive për të shmangur rrezikun e përhapjes në zona të tjera të banuara apo me vlera bujqësore.

Dhjetë zyrtarë dhe ish-zyrtarë të kompanisë “Bankers Petroleum”, përfshirë ish-drejtorin Leonidha Çobo dhe drejtorin aktual, shtetasin kinez Hongping Xiao, u paraqitën sot para Gjykatës së Apelit të Juridiksionit të Përgjithshëm, ku kërkuan ndryshimin e masës së sigurisë “arrest me burg” të dhënë më herët nga Gjykata e Fierit. Ata përballen me akuza të rënda që lidhen me një skemë të dyshuar mashtrimi financiar, e cila sipas Prokurorisë, ka dëmtuar rëndë interesat fiskale të shtetit shqiptar.

Prokuroria ka ngritur një sërë akuzash ndaj të arrestuarve, përfshirë:

• Krijimi i skemave mashtruese lidhur me TVSH-në (neni 144/a),
• Fshehja e të ardhurave (neni 180/3),
• Pastrimi i produkteve të veprës penale (neni 287),
• Shpërdorimi i detyrës (neni 248),
• dhe Moskryerja e detyrave nga organet tatimore (neni 181/a).

Dosja hetimore tregon se drejtues të “Bankers” kanë ndërtuar një sistem të sofistikuar shmangieje tatimore, ndërsa fitimet e padeklaruara dyshohet se janë kanalizuar në aktivitete për pastrimin e parave. Hetimet janë zgjeruar dhe dyshohet për përfshirjen e zyrtarëve të administratës tatimore dhe institucioneve të tjera shtetërore.

Seanca u zhvillua me dyer të mbyllura, për shkak të ndjeshmërisë së çështjes, ndërsa përfaqësues të Ambasadës së Kinës në Tiranë, të pranishëm jashtë gjykatës, nuk u lejuan të hyjnë në sallë. Prania e tyre tregon interesin diplomatik të Pekinit për fatin e shtetasit të tij, Hongping Xiao.

Gjykata e Apelit pritet të marrë një vendim në ditët në vijim, ndërkohë që skandali i “Bankers Petroleum” shihet si një ndër çështjet më të mëdha financiare në duart e drejtësisë shqiptare dhe test për integritetin e institucioneve që merren me hetimin e krimit ekonomik.