Paraqitet më e qetë situata këtë mëngjes në fshatrat e Gramshit të cilët prej tre ditësh janë përfshirë nga flakët. Ulja e temperaturave, ulja e intensitetit të erës, por dhe puna e qindra ekipeve të terrenit kanë bërë që sot situata të jetë më e qetë. Ka ende vatra aktive në fshatrat e Skënderbegasit dhe Kodovjatit, por ato po mbahen nën monitorim nga autoritetet dhe po punohet për fikjen e tyre.

Kanë filluar ndërkohë të kthehen në banesat e tyre banorët, pasi rrugët janë të hapura dhe nuk përbën rrezik.Më vonë ekipet do të kthehen në fshatra për evidentimin e dëmeve dhe do të kemi një statistikë paraprake.

Paralelisht po punohet për groposjen e bagëtive të djegura për evitimin e çdo epidemie të mundshme.

Kujtojmë se 3 njësi administrative në Gramsh u përfshinë nga flakët. Në Skëndërbegas u dogjën 7 fshatra, u prek nga zjarri fshati i 8, Narta, por fatmirësisht autoritetet arritën ta shpëtojnë këtë fshat.

Zjarri në Gramsh shënoi dhe viktimën e parë në vend, një 80 vjeçar i cili dyshohet të jetë dhe autori i këtij zjarri.

Autoriteti Kombëtar i Veterinarisë dhe Mbrojtjes së Bimëve deklaron se ka ngritur grupet e punës për monitorimin e fermave dhe raportimin mbi gjendjen e shëndetit të kafshëve blegtorale në zonat e prekura nga zjarret në bashkitë Delvinë, Finiq dhe Gramsh.

Në njoftimin për mediet, AKVMB ka publikuar të dhënat e deritanishme pas situatës së zjarreve që përfshiu këto tre bashki.

Në fshatrat Tremul dhe Aliko të Njësisë Administrative Aliko në Bashkinë  Finiq janë shkaktuar dëme në kullota dhe parcela me ullinj, por nuk ka humbje në bagëti.



Fermerët janë udhëzuar për hapat që duhet të ndjekin në rast rreziku.
Në Njësinë Administrative Dhivër, po në këtë bashki janë dëmtuar kullota dhe ullishte.

Fermat që rrezikoheshin nga mungesa e ushqimit për bagëtitë u evakuuan në zona të sigurta me kullota, larg vatrave të zjarrit.
Në fshatin Sirakat, Njësia Administrative Mesopotam është konstatuar djegia e një stalle me 4 viça të ngordhur, si dhe djegia e dy parqeve me bletë, përkatësisht me 140 dhe 57 zgjoje.
AKVMB deklaron më tej se në Bashkinë Delvinë situata paraqitet e rënduar.

Grupet e punës vijojnë monitorimin në terren. Paraprakisht dyshohet për djegien e një ferme me 25 krerë të imtash dhe 9 parqe bletësh, me gjithsej 500 zgjoje.
Në fshatrat Skëndërbegas, Arunas, Shëmbërdhenjë, Bletës dhe Kullollas janë konstatuar të djegur 9 krerë gjedh, 95 krerë të imtash dhe 50 zgjoje bletësh.
Grupet e punës janë në terren për evidentimin e plotë të dëmeve dhe në ndihmë të fermerëve. Kafshët e ngordhura po groposen.
Deri më tani, sipas protokolleve veterinare janë groposur 39 krerë të imta dhe gjedh.
Autoriteti Kombëtar i Veterinarisë dhe Mbrojtjes së Bimëve u bën thirrje fermerëve të bashkëpunojnë ngushtë me autoritetet shtetërore për mbrojtjen e jetës së tyre dhe shëndetit të kafshëve.
Për ndihmë ose raportim, qytetarëve u kërkohet të kontaktojnë në numrin e gjelbër 0800 33 66.

Në një postim në rrjetet sociale, kryeministri Edi Rama ka vlerësuar përpjekjet e jashtëzakonshme të strukturave shtetërore për përballimin e situatës së zjarreve në vend. Ai e cilësoi këtë një ditë sakrifice dhe krenarie për të gjithë ata që janë në terren, duke luftuar me flakët që kanë përfshirë disa zona të Shqipërisë.

Rama bëri me dije se gjatë 24 orëve të fundit janë raportuar 34 vatra aktive, prej të cilave 13 janë izoluar dhe shuar. Në operacionet e shuarjes janë angazhuar dhjetëra mjete zjarrfikëse, qindra efektivë të Forcave të Armatosura, zjarrfikës, punonjës bashkiakë dhe vullnetarë, si dhe janë vënë në dispozicion 5 helikopterë dhe një avion zjarrfikës Canadair, i ardhur si ndihmë nga Italia.

Ndërkohë, zonat që vazhdojnë të paraqesin rrezik të lartë janë Delvina, Poliçani, Gramshi, Dropulli, Finiqi, Berati, Tepelena dhe Bulqiza. Forcat nga toka dhe ajri vijojnë ndërhyrjet për të mbrojtur jetën e qytetarëve dhe pronën, ndërsa gatishmëria mbetet maksimale. Kryeministri vlerësoi gjithashtu edhe ndihmën e partnerëve europianë dhe të Emirateve, që po kontribuojnë në përballimin e kësaj situate të vështirë.

Postimi i kryeministrit Edi Rama:

Një ditë sakrifice dhe krenarie për të gjitha strukturat shtetërore, që vijojnë pa ndërprerje përpjekjet në terren për shuarjen e flakëve në të gjithë vendin

Gjatë 24 orëve të fundit:

34 vatra aktive

13 të izoluara dhe të shuara

Në operacione janë angazhuar:

Dhjetëra mjete zjarrfikëse dhe trupa të Shërbimit të Mbrojtjes nga Zjarri dhe Shpëtimi në të gjitha bashkitë e prekura

Mbi 600 efektivë të Forcave të Armatosura, zjarrfikës, punonjës bashkiakë dhe forca vullnetare

5 helikopterë dhe 1 avion zjarrfikës Canadair i sjellë bujarisht nga miqtë e shtrenjtë italianë

Qindra mjete, përfshirë autoambulanca dhe mjete transporti për evakuimin dhe mbështetjen e banorëve

Vatra që kërkojnë vëmendje në vazhdim: Delvinë, Poliçan, Gramsh, Dropull, Finiq, Berat, Tepelenë dhe Bulqizë, ku forcat nga toka dhe mjetet nga ajri po punojnë pa u ndalur për mbrojtjen e jetës së qytetarëve dhe pronës.

Gatishmëria është maksimale dhe bashkëpunimi mes të gjitha strukturave shtetërore dhe mbështetja e partnerëve europianë dhe emiratas po vijon për të përballuar këtë situatë të vështirë

Me rreth 90 vatra zjarri dhe mbi 45 mijë hektarë tokë të djegur që nga fillimi i vitit, Shqipëria po përballet me një nga sezonet më të rënda të dekadës. Situata ka dalë jashtë kontrollit, ndërsa shifrat tregojnë se përhapja e flakëve këtë vit është dyfishuar krahasuar me vitet e mëparshme.

Sipas Ministrisë së Mbrojtjes, deri në vitin 2024 regjistroheshin mesatarisht 6 zjarre në javë gjatë verës, ndërsa këtë vit shifra ka arritur në 13 zjarre në javë. Vetëm deri në fund të korrikut, flakët kanë prekur 12 banesa, 3 stane, 1 objekt kulti dhe një nënstacion energjie.

Megjithë dëmet e mëdha, pak qytetarë kanë të siguruar pronën e tyre kundër zjarrit. Të dhënat e Autoritetit të Mbikëqyrjes Financiare tregojnë se në gjysmën e parë të vitit 2025, primet e shkruara bruto për sigurimin nga zjarri dhe forcat e natyrës ranë me 2.4%, duke arritur në rreth 1.7 miliardë lekë. Numri i kontratave të sigurimit për këtë qëllim është mbi 31 mijë, me një rritje 9.3% krahasuar me një vit më parë, por ende i pamjaftueshëm për të mbuluar dëmet në shkallë kombëtare.

Nga viti 2021 deri në 2024, primet e arkëtuara për sigurimin nga zjarri janë rritur nga 2 miliardë lekë në 2.6 miliardë, ndërsa numri i kontratave është shtuar me 10.8%. Sidoqoftë, pjesa më e madhe e dëmeve do të mbulohet nga shteti. Qeveria ka nisur hartimin e një pakete kompensimi për fermerët që kanë humbur tokat bujqësore, ndërsa vlerësimi i dëmeve do të bëhet nga bashkitë përkatëse.

Shqipëria po përballet me vera gjithnjë e më të nxehta, duke shtuar ndjeshëm konsumin e energjisë elektrike nga familjet. Sipas të dhënave , gjatë muajve qershor, korrik dhe gusht të periudhës 2018–2024, konsumi mesatar familjar është rritur me 38%.

Në qershor, rritja ka qenë 25% (nga 186 mijë mWh në 232 mijë mWh), ndërsa korriku ka shënuar rekord me +46% (nga 192 mijë mWh në 280 mijë mWh). Në gusht, konsumi është rritur me 43% (nga 211 mijë mWh në 301 mijë mWh).

Sipas Entit Rregullator të Energjisë, 37% e konsumit vjetor të një familjeje lidhet me ngrohjen dhe klimatizimin. Përdorimi i kondicionerëve është shtuar ndjeshëm për shkak të temperaturave të larta dhe përmirësimit të kushteve të jetesës. Censi 2023 tregon se numri i familjeve me kondicioner është rritur me 27.5% krahasuar me 2011-ën. Vetëm në 5 muajt e parë të 2025-ës, importet e kondicionerëve arritën në 3.47 miliardë lekë, me rritje 411.6 milionë lekë nga viti i kaluar.

Ekspertët rekomandojnë masa për eficiencë energjie si termoizolimi i banesave dhe përdorimi i pajisjeve me klasë A+, të cilat mund të ulin ndjeshëm faturat dhe ndikimin në mjedis.

SCAN

Situata e zjarreve në zonën e Delvinës vijon të jetë tepër shqetësuese. Gjatë ndërhyrjes për shuarjen e flakëve, nënkryetari i Bashkisë së Delvinës, Filip Xuxi, është asfiksuar nga tymi teksa ndodhej në vijën e parë të frontit, si pjesë e grupit të emergjencës që po punon për kontrollin e situatës.

Xuxi u transportua me urgjencë në spital në gjendje të rëndë, pas inhalimit të një sasie të madhe tymi. Ai po trajtohet në repartin e urgjencës dhe gjendja e tij po monitorohet nga afër nga mjekët.

Zjarret kanë përfshirë disa zona pyjore përreth qytetit, duke shkaktuar dëme të mëdha materiale. Terreni i vështirë dhe erërat e forta po pengojnë punën e forcave të emergjencës për neutralizimin e flakëve.

GJKKO rrëzon kërkesën e Metës per te marr lirine, mbetet në fuqi masa e arrestit në burg

Avokatët e Ilir Metës kanë braktisur seancën në GJKKO teksa togat e zeza kanë marrë vendim lidhur me ish-Presidentin.

GJKKO vendosi rrëzimin e kërkesës së Metës, duke lënë në fuqi masën e arrestit në burg.

Avokati i Metës u shpreh për mediat se prokuroria kërkoi qëndrimin në burg të Metës dhe sipas tij kjo do të aprovohet nga GJKKO.

“Me mua këta gjykatës nuk kanë shanse të tallen, duhet ti kthehen ligjshmërisë.

I thashë gjyqtarit do të largohem sepse ju vendimin e keni marrë. 

Atij nuk i erdhi mirë, ata vendosin afërmendësh se çfarë kërkon Prokurori. Prokurori kërkoi rrëzimin dhe Gjykata do ta rrëzojë. 

Mbrojtjen nuk e bën Meta, por e bëj unë. Meta ka qëndrimet e tij politike, por mbrojtjen nuk ma dikton as Meta dhe asnjë tjetër. 

Unë jam këtu për të parashtruar medimet e mia dhe për të parë se si sillet Gjykata.

Mund të tallet Gjykata me çdo lloj avokati, por me mua nuk ka shanse të tallen,” tha avokati

Kryeministri Edi Rama ka shprehur falënderim dhe mirënjohje për zjarrfikësit, forcat e ushtrisë, policinë, vullnetarët dhe banorët që po përballen me flakët në disa zona të vendit.

Ai vlerësoi guximin e tyre për të rrezikuar jetën në mbrojtje të njerëzve, shtëpive dhe natyrës.

“🙏 Falënderim, respekt, mirënjohje me zemër për zjarrfikësit, forcat e ushtrisë, policinë, vullnetarët dhe banorët që po përballen me flakët, duke rrezikuar jetën për të mbrojtur njerëzit, shtëpitë dhe natyrën tonë 🦅🇦🇱,” shkroi Rama.

Ai u shpreh se ata që ndezin qëllimisht zjarre, shkatërrojnë pasurinë dhe rrezikojnë jetë, sidomos në kushtet e ngrohjes globale dhe valëve të flakëve që po përfshijnë Mesdheun, duhet të marrin dënimin më të rëndë që parashikon ligji.