Gjendët nga polombarët trupi i pa jetë 16 vjeçarit që u mbyt në Lagunën e Patokut.Ngjarja ndodhi këtë mesdite, kur dy 16-vjeçarët kanë hyrë për t’u larë në det, duke kaluar përmes kanalit që lidh lagunën me detin por dyshohet se i ka marrë rrjedhja.

Njëri prej tyre është nxjerrë nga uji dhe është transportuar në spital për ndihmë mjekësore, ndërsa 16-vjeçari tjetër u mbyt.Në vendngjarje mbërritën shërbimet e Komisariatit të Policisë Kurbin dhe të Policisë Kufitare, si dhe u kërkua ndërhyrja e polombarëve të Renea-s, për kërkimin dhe gjetjen e trupit.

Një krim i rëndë në familje ka tronditur Fierin, ku 26-vjeçarja Emanilda Rama ka pranuar përpara hetuesve se ka vrarë babain e saj, Anesti Rama, 56 vjeç. Në dëshminë e dhënë pas arrestimit, e reja ka pohuar se shkak i veprës së rëndë ishte kontrolli i rreptë dhe qëndrimet fanatike të të atit, i cili, sipas saj, nuk e lejonte të vishej apo të dilte sipas dëshirës.

Fillimisht, Emanilda kishte raportuar në polici se babai i saj kishte ndërruar jetë aksidentalisht, pasi ishte rrëzuar në tualet. Por hetimet zbuluan të vërtetën e dhimbshme. Ekspertët e mjekësisë ligjore konstatuan shenja dhune në fytin e viktimës, që tregonin qartë se 56-vjeçari ishte mbytur.

Gjithashtu, në këtë ngjarje është përfshirë dhe bashkëshortja e viktimës, nëna e 26-vjeçares, V. R., 53 vjeçe. Sipas Policisë së Shtetit, ajo ka ndihmuar vajzën në pastrimin e trupit dhe në tentativën për të fshehur gjurmët e krimit, duke u përpjekur të inskenojë një vdekje natyrale.

Pas fshehjes së provave, vajza ka telefonuar policinë për të njoftuar për “aksidentin”. Megjithatë, hetimet e shpejta kanë nxjerrë në pah mospërputhje në deklarata dhe prova të qarta të një vrasjeje të paramenduar.

V. R. ndodhet e shoqëruar në ambientet e Drejtorisë Vendore të Policisë Fier, ku po merret në pyetje për të përcaktuar saktësisht rolin dhe shkallën e përfshirjes së saj në ngjarjen e rëndë.

. Hetimet vijojnë nën drejtimin e Prokurorisë së Fierit.

Skemë mashtruese përmes SMS dhe aplikacioneve: Policia paralajmëron qytetarët – Mos klikoni, ju vjedhin paratë!

Drejtoria e Hetimit të Krimit Kibernetik ka ngritur alarmin për një skemë të re mashtruese që po përhapet me shpejtësi përmes SMS-ve dhe aplikacioneve të komunikimit online. Persona ende të paidentifikuar po dërgojnë mesazhe me linke të rreme, duke u shtirur si institucione bankare ose shtetërore dhe duke kërkuar “përditësim të të dhënave bankare” apo “verifikim të llogarisë”.

Sapo qytetarët klikojnë mbi këto linke dhe japin informacionin personal apo të llogarive të tyre bankare, mashtruesit marrin kontroll mbi këto llogari dhe kanë arritur të vjedhin shuma të konsiderueshme parash.

Policia thekson se asnjë bankë apo institucion zyrtar nuk kërkon kurrë të dhëna sensitive përmes SMS-ve ose faqeve të dyshimta dhe i bën thirrje qytetarëve të jenë vigjilentë.

Udhëzimet e Policisë:

• Mos klikoni në asnjë link të dërguar nga burime të panjohura;
• Mos jepni të dhëna personale, si numri i kartës bankare, PIN-i apo fjalëkalimet;
• Verifikoni çdo informacion të tillë nëpërmjet kontaktit direkt me bankën ose institucionin përkatës;
• Raportoni menjëherë çdo rast të dyshuar te Policia e Shtetit apo strukturat për krimin kibernetik.

Policia deklaron se po bashkëpunon ngushtë me bankat dhe partnerët ndërkombëtarë për të identifikuar dhe ndjekur penalisht autorët e këtyre veprimeve.

Respektoni sigurinë tuaj digjitale!

Mos ndani të dhëna personale me burime të pasigurta!

Janë zbardhur detaje të reja nga dosja hetimore ndaj Erion Veliajt, ku një dëshmi e pazakontë vjen nga një efektiv i shërbimit të burgjeve. Fatjon Baci, punonjës i transportit të të paraburgosurve, ka pohuar përpara hetuesve të SPAK se i ka dorëzuar telefonin e tij personal Veliajt gjatë rrugës nga paraburgimi i Durrësit në drejtim të Tiranës.

Sipas dëshmisë, Veliaj ka përdorur telefonin për të kryer dy telefonata me familjarët e tij – një herë përpara se të niste seanca gjyqësore dhe një tjetër pas përfundimit të saj.

“Në furgon, para se të mbërrinim në Tiranë, më kërkoi të telefononte vëllain se ndihej keq. Ia dhashë telefonin dhe ai komunikoi vetë me numrin,” ka deklaruar efektivi. “Më pas, përsëri pas gjyqit, para se të kalonim shinat pranë SPAK-ut, më kërkoi sërish telefonin. Edhe atëherë ja dhashë nga frika.”

Në dosje citohet se gjatë bisedës, Veliaj i ka komunikuar vëllait të tij për ecurinë e seancës dhe vlerësimet e avokatëve për paraqitjen e tij në sallë, duke i quajtur “10 me yll”. Ai ka shtuar gjithashtu se “e kanë me mua personale”.

Fatjon Baci ka pohuar se nuk ka mundur të dëgjojë të gjitha bisedat për shkak të zhurmës së trafikut, por vendimi për t’ia dhënë telefonin, sipas tij, u diktua nga “presioni dhe respekti ndaj figurës publike të të arrestuarit”.

Ky incident shënon një tjetër zhvillim në hetimet e nisura ndaj ish-kryetarit të Bashkisë së Tiranës, Erion Veliaj, i cili ndodhet nën hetim për disa akuza të rënda, përfshirë korrupsionin dhe pastrimin e parave. SPAK vijon hetimet mbi rrjedhjen e informacionit dhe mundësinë e favorizimeve gjatë qëndrimit të Veliajt në paraburgim.

Shumica e bashkive të vendit janë duke parë tkurrje të forta të popullatës dhe për rrjedhojë edhe të bizneseve.

Të dhënat zyrtare nga INSTAT tregojnë se në 36 bashki nga 61 gjithsej numri i bizneseve person fizik që zakonisht përfshijnë të vetëpunësuar ose biznese me xhiro deri në 2 milionë lekë është ulur në mënyrë të ndjeshme.

Në rang vendi si biznese person fizik ishin aktive mbi 97 mijë subjekte me 2024, me rritje vjetore vetëm 0.5%, por në bashki të vogla ka rënie të fortë për shkak të rënies së popullsisë. Personat fizikë përbënin 74% të ndërmarrjeve gjithsej, (pa përfshirë fermerët), ndërsa pjesa tjetër janë të regjistruar si persona juridikë, sipas INSTAT.
Sipas të dhënave të përpunuara për ndryshimin vjetor të bizneseve “Person Fizik” në vitin 2024 krahasuar me 2023, vihet re një polarizim i fortë mes zonave të mëdha urbane dhe bashkive më të vogla. Në pjesën më e madhe e bashkive ka rënie, ndërsa vetëm një pjesë e kufizuar ka shënuar rritje.
Në bashkitë me krizën më të madhe të bizneseve person fizik kryeson Pusteci me një rënie drastike prej -25% të bizneseve, e ndjekur nga Konispoli -7.2%, Tropoja -6.7%, Mati me –6.5% dhe Selenica -6.1%.

Këto bashki janë tipike të vogla kanë nivel të lartë emigrimi, plakje të popullsisë dhe mungesë mundësish për zhvillim të qëndrueshëm të aktivitetit privat. Rënia e bizneseve tregon jo vetëm largimin e popullsisë, por edhe mbylljen e iniciativave të vetëpunësimit për shkak të mungesës së tregut lokal.
Në të kundërt bashkitë më rritje më të madhe të bizneseve person fizik janë ajon Këlcyrës +10.7%, e ndjekur nga Delvina +8.9%, Sarandë +7.5% dhe Vorë me 6.6%, të cilat kanë lidhje të forta turistike ose logjistike, si Saranda që ka përfituar nga turizmi, apo Vora që ndodhet në korridorin industrial mes Tiranës dhe Durrësit. Po ashtu, Gjirokastra dhe Libohova kanë përfituar nga investime në agroturizëm.
Tirana, Durrësi dhe Shkodra shfaqin rritje të lehtë, çka tregon një stabilitet në aktivitetin ekonomik në qendrat urbane, të cilat ende grumbullojnë popullsi nga zonat rurale dhe në këtë mënyrë ruajnë edhe dinamikën në bizneset e vogla.
Trendët demografike janë duke u bërë përcaktuese në ekonominë rajonale. Pakësimi dhe plakja e popullsisë po çon në faliment bizneset e vogla për shkak të ngushtimit të kërkesës por edhe të emigrimit të qendrave më të mëdha urbane.
Popullsia e vendit nga viti 2011 në vitin 2024 ka rënë me 17 për qind, ndërsa ritmet e rënies po thellohen vitet e fundit nga ikja e të rinjve dhe nivelet tejet të ulëta të lindjeve. /MONITOR