Kryeministri Edi Rama ka theksuar në episodin e radhës të podcastit “Flasim” avancimet e Shqipërisë në fushën e identitetit digjital, duke nënvizuar arritjet e fundit dhe planet për të ardhmen.
Në podcast, Rama shpalli se koncesioni për kartat e identitetit ka përfunduar, dhe se është krijuar një kompani shtetërore e angazhuar për prodhimin e kartave të identitetit më të mira dhe më të lira. Sipas tij, një nga qëllimet kryesore është kalimi i kartës së identitetit në platforma dixhitale, përmes përdorimit të telefonave dhe kompjuterëve si portofol digital.
Ai shtoi se Bashkimi Europian ka vendosur që 2027 të jetë afati për futjen e identitetit digjital, dhe se për Shqipërinë testet e fundit janë në vijim, me qëllimin që çdo shqiptar të pajiset me identitet digjital deri në vitin 2026.
“Kur koncesioni i hershëm i kartave të identitetit përfundoi, ne morëm përsipër një sfidë të madhe: krijimin e një kompanie shtetërore për prodhimin e kartave të identitetit, më të mira dhe më të lira se të mëparshmet. Kompania Identitek e përballoi me sukses këtë sfidë dhe tashmë është angazhuar për sfidën e re të identitetit digjital, pra kalimin e kartës së identitetit në celular apo kompjuter dhe funksionimin e saj si një portofol digjital shumëfunksional.
Edhe Bashkimi Europian po ecën në këtë drejtim dhe ka vendosur vitin 2027 si afatin për futjen e identitetit digjital në jetën e përditshme të Europës. Shqiptarët do ta kenë gati identitetin e tyre digjital në fillim të vitit 2026”, tha ai.
