Kryeministri Edi Rama ka ironizuar opozitën me një gjest simbolik gjatë seancës së sotme parlamentare. Para se të largohej nga salla e Kuvendit, kreu i qeverisë përshëndeti me dy gishtat lart, një veprim që u interpretua si mesazh ironik ndaj Partisë Demokratike.
Fjalimi i Ramës ishte i mbushur me tone kritike dhe ironi ndaj opozitës, të cilën e akuzoi për qëndrime kontradiktore në raport me drejtësinë dhe zhvillimet e fundit politike. Kryeministri e lidhi këtë sjellje me reagimet e PD-së ndaj ftesës për Shqipërinë në Bordin e Paqes, duke sugjeruar se opozita po përpiqet ta minimizojë një arritje që, sipas tij, ka rëndësi ndërkombëtare për vendin.
Gjatë fjalës së tij, Rama theksoi se opozita po përdor tema të drejtësisë dhe akuza politike për të krijuar konfuzion dhe për të zbehur rolin e Shqipërisë në arenën ndërkombëtare.
Gjestet dhe ironitë e kryeministrit nuk kaluan pa u vënë re në sallë, duke shtuar edhe më shumë tensionin politik mes mazhorancës dhe opozitës.
