Presidenti rus Vladimir Putin ka zhvendosur të paktën katër bombardues strategjikë Tu-95MS më afër Evropës, duke rritur ndjeshëm tensionet gjeopolitike në rajon. Sipas raportimeve nga Insider UA, avionët janë të pajisur me raketa lundrimi, duke krijuar një “probabilitet të lartë për një sulm të afërt”.
Tu-95MS janë avionë të rëndë me kapacitet bërthamor dhe konvencional, të përdorur gjerësisht nga Rusia për goditje në Ukrainë. Ripozicionimi i tyre drejt bazave më afër kufirit me Ukrainën dhe Evropën – nga Ukrainka në Lindjen e Largët ruse në Olenya dhe Engels-2 – shihet si një përshkallëzim i drejtpërdrejtë ushtarak.
Lëvizja e Kremlinit vjen pas deklaratës së Donald Trump, i cili tha se kishte urdhëruar vendosjen e dy nëndetëseve bërthamore amerikane pranë Rusisë, në përgjigje të një kërcënimi për luftë atomike nga Dmitry Medvedev, një nga aleatët më të ngushtë të Putinit.
“Nëndetëset amerikane tani janë aty ku duhet të jenë,” deklaroi Trump të dielën vonë.
Ndërkohë, Ukraina ka dhënë alarmin për lëshimin e një rakete hipersonike ruse në një bazë ajrore ukrainase, duke shtuar frikën për një valë të re të sulmeve intensive.
Tensionet intensifikohen gjithashtu në prag të vizitës së Steve Witkoff, i dërguari special i Trump, i cili pritet të mbërrijë në Moskë këtë të mërkurë. Shtetet e Bashkuara kanë paralajmëruar sanksione të reja ndaj Kremlinit, nëse nuk ndërmerren hapa konkretë drejt armëpushimit dhe negociatave për paqe.
Situata mbetet e tensionuar, ndërsa përplasjet mes Perëndimit dhe Rusisë rrezikojnë të futen në një fazë më të ashpër dhe të paparashikueshme të konfrontimit ushtarak.
