Komiteti Parlamentar i Stabilizim-Asociimit Shqipëri–Bashkimi Europian nuk arriti të miratojë një rezolutë të përbashkët mbi procesin e integrimit të Shqipërisë, pas mosmarrëveshjeve mes përfaqësuesve të Partisë Socialiste dhe Partisë Demokratike lidhur me amendamentet e propozuara.
Partia Demokratike deklaroi se konsensusi dështoi pasi socialistët kundërshtuan mbi 30 amendamente të opozitës, të cilat, sipas saj, trajtonin çështje kyçe si lufta kundër korrupsionit, respektimi i vendimeve gjyqësore, forcimi i shtetit të së drejtës, transparenca dhe llogaridhënia. PD pretendon se këto amendamente morën mbështetjen e eurodeputetëve, por nuk u përfshinë në tekstin përfundimtar për shkak të qëndrimit të mazhorancës.
Nga ana tjetër, Partia Socialiste theksoi se deputetët e saj dhe eurodeputetët votuan në favor të rekomandimeve që mbështesin procesin e anëtarësimit të Shqipërisë në Bashkimin Europian. Sipas PS-së, dokumenti i përgatitur nga Sekretariati i Komitetit nuk kishte nevojë për ndryshime, pasi ai mbështetej edhe në Rezolutën e Parlamentit Europian për Shqipërinë dhe në rezolutën e miratuar me konsensus nga Kuvendi i Shqipërisë për integrimin europian.
Socialistët pranuan se mbështetën disa prej amendamenteve të opozitës, por kundërshtuan ato që, sipas tyre, cenonin balancën e dokumentit dhe nuk pasqyronin progresin e njohur nga institucionet europiane. Ndërkohë, PS akuzoi opozitën se synonte të hiqte referencat për arritjet e Shqipërisë në procesin e integrimit.
Megjithëse të dyja palët shprehën mbështetje për anëtarësimin e Shqipërisë në Bashkimin Europian, mbledhja në Strasburg përfundoi pa një rezolutë të përbashkët.
