Ari drejt rekordeve të reja, investitorët e shohin si “strehë të sigurt” në tregjet e paqëndrueshme
Ari po vijon të tërheqë investitorët në mbarë botën, duke u konsideruar si një nga asetet më të sigurta në një periudhë të karakterizuar nga pasiguri ekonomike dhe tensione gjeopolitike.
Luhatjet e forta në bursat ndërkombëtare, rritja e inflacionit dhe zhvillimet e fundit në Lindjen e Mesme, përfshirë konfliktin në Iran, kanë shtuar interesin për metalet e çmuara. Pasiguria në Evropë dhe Amerikën e Jugut ka ndikuar gjithashtu në rritjen e kërkesës për ar dhe argjend.
Sipas të dhënave të fundit, gjatë vitit 2025 çmimi i arit është rritur me rreth 64%, ndërsa më 10 mars ai arriti një rekord historik duke kaluar nivelin e 5,200 dollarëve për ons.
Ekspertët parashikojnë se trendi rritës mund të vazhdojë edhe gjatë vitit 2026, me çmimin që mund të arrijë deri në 6,000–6,300 dollarë për ons. Kjo rritje pritet të mbështetet nga kërkesa e lartë e bankave qendrore dhe investitorëve që kërkojnë të mbrojnë kapitalin e tyre.
Megjithatë, tregu i arit mbetet i ndjeshëm ndaj zhvillimeve globale. Në fillim të vitit 2026, çmimi pësoi një rënie të shpejtë, duke zbritur nga 5,419 në 4,660 dollarë për ons brenda pak ditësh, çka tregon për luhatshmërinë e lartë të këtij tregu.
