Peqini është tronditur nga një aksident tragjik automobilistik që i mori jetën dy të rinjve 24-vjeçarë, Gabriel Lluca dhe Denis Korbi.
Historia e Gabrielit është veçanërisht e dhimbshme. Në moshën vetëm 8-vjeçare, ai kishte mbijetuar një aksident të rëndë pranë shkollës “Demir Godelli” në qytetin e Peqinit, aty ku jetonte me familjen. Një automjet i kishte kaluar mbi trup, duke i shkaktuar fraktura të shumta dhe plagë të rënda, por me shumë përpjekje mjekësore dhe fat, ai arriti të mbijetojë, duke prekur zemrat e të gjithë komunitetit.
Por këtë fundgushti, fati nuk i dha më një shans tjetër. Në të njëjtin qytet ku dikur kishte shpëtuar mrekullisht nga vdekja, 24-vjeçari humbi jetën tragjikisht, duke lënë pas dhimbje dhe lot.
Familjarët dhe miqtë e përshkruajnë Gabrielin si një djalë plot energji, të dashur, gjithmonë me buzë në fytyrë. Ai ishte një nga katër fëmijët e familjes Lluca, e cila tre vite më parë përjetoi edhe një tjetër humbje të madhe – ndarjen nga jeta të babait, Agron Lluca.
Kjo tragjedi e dyfishtë ka lënë të pikëlluar jo vetëm familjen, por të gjithë bashkëmoshatarët dhe komunitetin e Peqinit, që sot i japin lamtumirën një djali që dikur i kishte sfiduar të gjitha shanset për të jetuar.
