Gazetari Artan Hoxha, i cili kishte paralajmëruar shpërthimin e një të ri për të mbuluar ngjarjen e Fushë-Krujës, reagoi pas lajmit se SPAK kërkon arrestimin e Arben Ahmetajt.
Hoxha në postimin e tij paralajmëron se Ahmetaj është larguar jashtë vendit, dhe me gjasë nuk do të arrestohet, por do të shpallet në kërkim pas aprovimit që do të jepet nga Kuvendi.
POSTIMI I PLOTË
Komandanti nuk më zhgënjen kurrë…
Ashtu si parashikova të shtunën, se për të mbuluar skandalin e Fushë-Krujës, do të plaste një skandal më të madh për të mbuluar të parin, ashtu bëri…
Ja ku jemi sot…
“Papritur” dhe “pakujtuar” kërkohet arrestimi i ish-zv/kryeministrit Arben Ahmetaj…
Arben Ahmetajn aty e kishim që prej një viti, pse duhej ta “arrestonin” me patjetër sot, pasi u “siguruan” që e ka kaluar kufirin shëndoshë e mirë???!!!!
Ja ku e keni “temën e ditës” për të kaluar vapën e këtij meskorriku…
Ndodhi skandali i abuzimit dhe korrupsionit me Safetin, kandidatin e përzgjedhur dhe promovuar direkt nga komandanti, menjëherë me pas plasi “skandali me muxhahedinët”…
Ndodhi skandali me Rrajat në Fushë-Krujë, që atakon direkt kryeministrin dhe tregon degradimin e pushtetit, menjëherë më pas plaset “arrestimi i ish-zëvendësit të kryeministrit”…
Të lumtë Komandant, je magjistar i vërtetë për ta lënë miletin me gojë hapur…
SPAK ka reaguar zyrtarisht në lidhje me kërkesën që i ka dorëzuar Kuvendit, për dhënien e autorizimit për arrestimin e deputetit socialist Arben Ahmetaj, dhe për kontrollin e banesës së tij.
SPAK ka ngritur tre akuza në drejtim të Ahmetajt, i cili ka mbajtur postin e numrit dy të qeverisë, si dhe ka drejtuar ministrinë e Financave.
Ai akuzohet për korrupsion në aferën e inceneratorëve, për të cilën më herët janë vënë në pranga dhe Lefter Koka e Alqi Bllako, të dy ish-deputetë në Kuvend, dhe njëri prej të cilëve Ministër Mjedisi.
Ahmetaj akuzohet për “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Korrupsionit pasiv të funksionarëve të lartë shtetërorë ose të zgjedhurve vendorë” dhe veprën penale të “Pastrimit të produkteve të veprës penale ose veprimtarisë kriminale”, në bashkëpunim, më shumë se një herë, parashikuar nga neni 287 paragrafi i dytë i K.Penal.
