Rama ‘kërcënon’ me riedukim gazetarët që i kthejnë fjalën

Rama ‘kërcënon’ me riedukim gazetarët që i kthejnë fjalën

92
SHPËRNDAJE

Kryeministri Edi Rama zhvilloi sot një konferencë me gazetarët, ku prezantoi rezultatet e Këshillimit Kombëtar, proces i cili sipas tij do të zgjidhë dilemat e qeverisë për vendimmarrjen e së ardhmes. Edhe në konferencën ku gazetarët e dëgjuan për më shumë se një orë, Rama nuk i kurseu sulmet ndaj tyre.

Fillimisht Rama e quajti dashakeqëse pyetjen e gazetares Blerina Gjoka, se pse qeveria shqiptare vazhdon të paguajë para për inceneratorët që janë duke u hetuar nga SPAK, dhe kanë çuar në dhjetra arrestime, ndërsa më pas tentoi të diktonte edhe trajtimet e lajmeve nga ana e tyre.

Rama ‘shpalli’ gazetaren Elia Zotka si kryetaren e shoqatës së gazetarëve, të cilës i kërkoi që të monitoronte të tjerët, pasi në të kundërt do ti dërgonte edhe ata në riedukim siç ka bërë më gazetaren Ambrozia Meta, të cilës i ka ndaluar për 60 ditë që të futet qoftë në ambientet e kryeministrisë, qoftë në selinë e PS-së.

Shkak për këtë u bë diskutimi në lidhje me krijimin e një ‘grupi parlamentar të PS-së brenda burgut’.

Rama paralajmëroi se i njëjti fat mund të ndjekë edhe gazetarët që prishin paktin, ose e thënë hapur, ata gazetarë që nuk i binden vullnetit të kryeministrit.

“Shumë faleminderit të gjithëve, edhe ti si kryetare e sindikatës, do të monitorosh gjithë të tjerët që ti qëndrojnë paktin. Një merak kam me ty, që të mos hysh edhe ti në riedukim”, tha Rama në konferencë me gazetarët.

Tendencat e Ramës për të intimiduar gazetarët kanë qenë të dukshme, favorizuar këtu edhe nga fakti se në Shqipëri mungojnë shoqatat për lirinë e medias, dhe ato që janë shpesh janë të pafuqishme për të ngritur zërin.

Liria e mediave në Shqipëri është parë me shqetësim edhe nga BE, duke e përcaktuar dhe si një kusht për qeverinë Rama për procesin e integrimit të vendit.

Mandati i tretë e shfaqi Ramën më të butë, por premtimi i tij për të pasur një sjellje korrekte me gazetarët duket se u shua shpejt, ende pa u mbushur viti.

S'KA KOMENTE