Rënia e lartë e çmimit të grurit krahasuar me vjet rrezikon të shtojë humbjet për fermerët që rritën të mbjellat me grurë, por me kosto të lartë nga shtrenjtimi i naftës dhe plehërave kimike.
Problematikë për këta fërmerë është edhe mungesa e tregut të shitjes së grurit, ku kompanitë e blojës furnizohen më së shumti nga importi.
Ministrja e Bujqësisë Frida Krifca në një takim të zhvilluar me përfaqësues të fabrikave të blojës dhe prodhuesve të bukës tha se kompanitë shqiptare do të blejnë grurin vendas, si zgjedhjen primare të lëndës së parë për fabrikat e tyre.
“Jemi dakordësuar së bashku që prioritet në këtë sezon të korrjeve të grurit patjetër që do t’i japim mbështetje prodhimit vendas dhe fermerëve tanë, të cilët na kanë dëgjuar dhe janë orientuar drejt prodhimit të grurit gjatë sezonit të kaluar”, u shpreh Krifca në përfundim të një takimi që zhvilloi me përfaqësuesit e Shoqatës së Miellit si dhe Shoqatës së Bukës, Brumërave dhe Pastiçerive.
Ministrja bëri të ditur se, ky hap vjen në kushtet, kur në tregjet globale të grurit dhe çmimi i bursës ka pasur një rënie të ndjeshme krahasuar me vitin e kaluar. “Vendimarrja jonë ka qenë për të rritur prodhimin e grurit vendas, në kushtet e një situate të pazakontë, dhe qeveria shqiptare i është përgjigjur një moment të luhatshëm gjeopolitik, i cili solli nevojën për të mbështetur pikërisht prodhimit grurit”.
Krifca nënvizoi se sfida kryesore është garantimi i grumbullimit dhe shitja e grurit tek fabrikat e miellit në vend.
“Me përfaqësues të këtij sektori jemi ulur dhe kemi diskutuar gjerësisht mbi nevojat e sektorit, kapaciteteve të rezervave të grurit që kemi aktualisht, mbi nevojat që ka sektori për të blerë grurin dhe kemi dakortësuar bashkërisht që orientimi ynë primar do të jetë shitja e prodhimit vendas”, tha ministrja.
Krifca deklaroi se, për kompanitë e blojes zgjedhja e parë do të jetë prodhimi vendas i grurit. Janë dy shoqata që janë dakortësuar për për blerjen e grurit shqiptar nga fermerët.
Ministrja shprehu angazhimin se do të jetë në një kombinim të vazhdueshëm ecuria e këtij procesi, pasi janë faktor të bursës, tregjeve ndërkombëtare dhe ato gjeopolitike që përcaktojnë çmimet e tregut.
Krifca, tha se ”duke qenë në një komunikim të vazhdueshëm dhe dialog të hapur, me aktorët e tregut, sigursht që jemi në gjendje t’i përgjigjemi nevojave të vendit më së miri”.
Krifca theksoi se sfida është garantimi i grumbullimit dhe shitja tek fabrikat shqiptare të miellit e grurit vendas. Në takimin me kompanitë shqiptare të cilat merren me importin e drithërave, ministrja u kërkoi të mbështesin dhe grumbullojnë prodhimin tonë të grurit. Ajo i ftoi kompanitë shqiptare të cilat importojnë grurë të fokusohen tek blerja e grurit vendas.
Vjet sipas ministres së Bujqësisë u mbështetën me subvencione rreth 4 mijë fermerë me një sipërfaqe të konsiderueshme të prodhimit të grurit, teksa paralelisht fermerët u ndihmuan për punime të mekanizuara me naftë pa taksa, vitin e kaluar, por edhe këtë vit.MONITOR
