Tensione mes Turqise dhe Greqise

Tensione mes Turqise dhe Greqise

61
SHPËRNDAJE

Refuzimi i Greqisë për të ekstraduar në Turqi 8 puçistët e arratisur ka sjellë një reagim të ashpër dhe tejet të papritur të Ankarasë zyrtare. Me anë të deklarate për shtyp, ku nuk mungojnë tonet kërcënuese dhe gjuha aspak diplomatike, Turqia paralajmëron seriozisht një rivlerësim total të marrëdhënieve me Greqinë. Ky zhvillim i ri në rajon, pritet të tensionojë edhe më shumë situatën në Ballkan, që duket se po del jashtë kontrollit në shumë “fronte”, duke patur në konsideratë acarimin e marrëdhënieve mes Serbisë e Kosovës, faktit që në Maqedoni ende nuk ka një qeveri të re si edhe situatën deri diku të paqetë në Mal të Zi pas tentativës për grusht shteti.REAGIMI I TURQISË

Ministria turke e Punëve të Jashtme ka publikuar një komunikatë me shkrim rreth vendimit të Gjykatës së Lartë të Greqisë (Areios Pagos) për mos t’i dorëzuar Turqisë 8 ushtarakët puçistë, që u arratisën në Greqi pas tentativës së dështuar për grusht shteti, ndërmarrë më 15 korrik 2016, sipas saj “nga organizata terroriste guleniste (FETO)”.

Komunikata e Ministrisë së Punëve të Jashtme të Turqisë rikujton se drejtësia greke ka refuzuar kërkesën për ekstradimin e ushtarakëve puçistë, që kanë marrë pjesë direkt në tentativën për grusht shteti, ndërsa vijon me këto fjalë: “Protestojmë këtë vendim, i cili pengon nxjerrjen përpara Gjyqësorit të pavarur turk të këtyre personave, që kanë luajtur rol aktiv në një tentativë për grusht shteti duke shënjestruar rendin demokratik në Turqi, martirizuar 248 dhe plagosur 2 mijë e 193 qytetarë turq në radhët e forcave të sigurisë dhe civilëve, si dhe duke kërcënuar seriozisht jetën e Presidentit tonë të nderuar.”

“Përmes këtij vendimi të zyrtarëve grekë, që deri më sot kanë penguar llogaridhënien përpara drejtësisë të anëtarëve të organizatave terroriste, sidomos të DHKP/C-së dhe PKK-së, të cilat kanë në shënjestër Turqinë, është parë edhe një tjetër herë se Greqia, një vend fqinj dhe aleat, i bën bisht përmbushjes së kërkesave dhe përgjegjësive minimale në luftën kundër terrorizmit dhe krimit të organizuar”, – vijon komunikata e MPJ në Ankara.

Qëndrimi në fjalë i Gjyqësorit grek – thekson më tej komunikata – shkakton mosndëshkimin e kriminelëve dhe njëherësh shkeljen e të drejtave të personave të dëmtuar, në kundërvajtje me normat dhe parimet e të drejtës ndërkombëtare.

“Si një vend i ballafaquar me puçe ushtarake në të kaluarën, Greqia, mjerisht, me këtë vendim ka rënë në pozitën e një shteti përkrahës dhe strehues të puçistëve”, nënvizohet mes të tjerash në komunikatën e Ministrisë së Jashtme turke.

Pasi tërheq vëmendjen se kundër vendimit në fjalë të Gjykatës së Lartë të Greqisë do të ndiqen të gjitha rrugët ligjore të mundshme dhe do të vazhdohen nismat për ekstradimin dhe gjykimin e kriminelëve, komunikata me shkrim e MPJ turke përfundon me këto reshta: “Efektet e këtij vendimi, i cili mendojmë se është i motivuar politikisht, mbi marrëdhëniet tona dypalëshe, mbi bashkëpunimin tonë në luftën kundër terrorizmit dhe mbi projektet tona të përbashkëta në fusha të tjera bilaterale e rajonale, do t’i nënshtrohen gjithashtu një rivlerësimi tërësor.”

S'KA KOMENTE

PËRGJIGJU

Comment moderation is enabled. Your comment may take some time to appear.